Sadung Pa mare makau na KIO Costom shagyit kaba makau kaw Myen Hpyen Nbungli bawm wa jahkrat bun wa ai lam ginra masha ni kaw na chye lu ai.
November 16 laban ya jahpawt hkying 9 jan ram hta, Myen Hpyen Y12 Nbungli langai the tsaw dik ai kaw na bawm wa jahkrat bun da ai nga, Sadung ginra masha langai KNG shiga de tsun dan wa ai re.
“Mani hpawt hkying 9 jan daram aten hta Sadung Shanglawt gate makau kaw wa jahkrat ma ai, Shanglawt gate hpe wa jahkrat bun ai gaw she n rai i? gadai hpe ma mung gaw n hkra ai, lam lahta kaw wa hkrat ai,” nga tsun dan ai re.
Myen Hpyen nbungli bawm wa jahkrat bun ai makau kaw gaw, KIO Dung 3 Costom Shagyit kaba dung ai shara rai nna, dai shara kaw, Kanpaiti de pru shang ai mawdaw kaji kaba yawng hpe hkawn kang hkap hta ai shara re lam chye lu ai.
Myen Hpyen Nbungli bawm wa jahkrat bun ai majaw, Masha si hkala lam the dum n ta hten za ai lam gaw, hpa n nga ai lam matut chye lu ai.
Sadung Gat Yang kaw mung, lai wa sai September 29 ya shana de Nbungli bawm wa jahkrat bun wa ai majaw, mung shawa marai 8 si nna, marai 6 Hkala sawng hkrum wa ai re.
Myen Hpyen dap gaw, Majan byin ai lam n nga tim, mara kata Mung shawa ni hkrai nga ai shara hpe bawm hkan jahkrat bun taw ai mung rai nga ai.
Ndai laman Myen Hpyen dap hte Miwa Asuya gaw, Miwa, Myen, India Mungdan kaba masum hpe matut ai Lido lam kaba hpaw na lam hpe myit hkrum ta masat htu da ai lam nga ai re.