Mandalay kaw na Myitkyina de lung ai Mawdaw Kaji kaba yawng hpe Myen Hpyen dap gunrai masat da nna, laja lana san jep ai lam ni galaw nga ai majaw, Mawdaw la ni mayak hkrum sha nga ai lam tsun ai re.
Mandalay Myitkyina Mawdaw ni yawng hpe, Myen Hpyen dap maga na masat da hkrum ai gunrai ni gaw, Tsi mawan, Jak Sau, Myi hprap wan hte seng ai arung arai, Bettry zawn re ai lam ni hpe tsep kawp n htaw shangun ai re.
“Ya Shan the ni gaw, madung shan the n htaw shalai shangun ai arung arai ni hpe san jep ai ga rai nga ai, Sagaing maga de gade daram sawng ai nga yang, Mawdaw la n kau hpe adup abyen ai lam ni galaw ai, n dai rai ni n mai htaw ai n chye ai i? nga na bye ai lam ni galaw ai, ngut na mung ginsup hpun palawng nga yang mung htuk lahkawng masum sha mai htaw ai, n shadu yang n shadu ai hku grai jep ai,” nga Mawdaw la langai KNG shiga de tsun dan wa ai rai nga ai.
Mawdaw la ni gaw gunrai htaw shalai ni rai yang, Ginra Uphkang rung ni kaw na madi shadaw laika hte sha mai htaw ai rai nna, madi shadaw laika n lawm ai ni hpe laja lana ladu lai san jep ai lam ni galaw ai nga matut tsun dan ai re.
Lai wa sai September 25 ya shani kaw na Madi shadaw laika lawm ai ni hpe gaw san jep ai lam ni loi li shayawm ya sai rai tim, shan the masat da ai arung arai lawm n lawm hpe gaw naw kasawk jep taw nga ai lam chye lu ai.
Mandalay Myitkyina lam kaba n tsa hta, Myen Hpyen dap sha n ga, Laknak hpai rawt malan hpung ni yawng mung ladu lai sawk jep ai majaw, Mawdaw la ni a matu grai jam jau yak hkak ai lam tsun ai re.
KIA PDF dap maga na ni mung lam lapran kaw grai jep ai, gumhpraw mung hta ai, n kau shara hkan nga yang, Tsi mawan lawm ai mawdaw n kau hpe nga yang hkap jahkring da ai, n dai tsi rai ni gaw, lama Myen Hpyen dap na she rai yang anhte mawdaw kaw hkum bang u ga le, shan the nbungli hte htaw la na rai nga ai, ya anhte htaw ai gaw, Mung shawa ni a matu, Myitkyina tsi seng hkan na matu htaw ai sha re,” nga nna laga mawdaw la langai mung KNG de kahtap tsun dan ai re.
Lam lapran y ana zawn, laknak lang wuhpung ni ladu lai san jep ai majaw, Myitkyina de gunrai ni du na ten kaw n du lam lapran hten mat ai arung arai ni mung nga ai majaw, Myitkyina de gunrai manu tsaw rawt taw nga ai re.
Jarit mayan Myen hpyen dap shara ni hpe KIA htim gasat zing madu kau ai hpang, Miwa maga na jarit yawng pat kau ya wa ai re.
Ya ten Miwa hkran maga de na gunrai n kau Myitkyina de htaw shalai bang nga sai rai tim, tara n shang ai hku na lagu htaw shalai ra taw ai majaw, gunrai manu yawm na daram n lu yawm ai sha, manu tsaw rawt nga ding yang re hpe chye lu ai.