Hpakant ginra kata hta lai wa sai bat hta majan laja lana byin wa nna, Mung shawa n kau Majan man kata pat hkrum ai lam ni mung nga wa hpe chye lu ai re.
Lai wa sai bat kru ya shani hta San Chyoi, Maw Tawng majan man hta ginra masha n kau pat hkrum ai lam ni byin lai wa ai rai tim, ya ten dai ginra masha ni yawng shim lum ai shara de a tsawm sha lu htawt sit yen sai lam chye lu ai.
Lai wa sai bat 5 ya, 6 ya shani hkan byin lai mat wa ai majan masa lam the seng nna, ginra masha langai KNG de ndai zawn tsun dan wa ai re.
“Myen ni ya San Chyoi hpe lu hkra bai htim gasat la na maw taw ai, lai wa sai bat kru ya shani Mashi Kahtawng Shingdu Kyuhpyi bum Rahkaing Kung ngu ai shara kaw anhte na ni nga ai shara de htu lung wa ma ai, dai kaw laja lana gap gasat hkat ai, dai ni gaw loi zim taw nga ai,” nga tsun dan wa ai re.
Myen Hpyen dap maga na Hpyen n’gun kaba hte htu shadut htim gasat lung wa ai majaw, KIA the KPDF dap ni shara la da ai, San Chyoi, Maw Tawng sa wa lam na Maw Tawng Shagyit hpe bat kru ya shani gan hting nut yen kau da ya ai lam chye lu ai.
Bat kru ya shani hta, lai wa sai ten, KPDF ni dung ai Maw Tawng Shagyit kaw Myen ni mahkawng nga ai ten, KIA maga Drone hte bawm sa jahkrat bun wa ai majaw, Myen hpyen dap maga na sum machyi lam ni law wa ai hpe chye lu ai.
Ya ten Majan byin nga ai shara gaw, Mashi Kahtawng Kyuhpyi bum grup yin hte San Chyoi, Mawtawng, Seng Tawng sa wa lam shara ni hta re lam chye lu ai.
Ya ten Hpakant ginra kata Myen Hpyen dap ni shamu shamawt nga ai lam hte seng nna, PDF magam gun langai mung n dai zawn tsun dan wa ai re.
“Dai ni gaw zim taw ai ga rai nga ai, Myen ni gaw, ya hte anhte maga yen kau da ya ai, Lawng Hkang, Mawsiza, Mawwan Hpakant dai mayan hkan gaw wang lu wang lang hkawm taw ai ga rai nga ai, shani shagu ngu na ang katut gap gasat hkat ai lam ni gaw nga ai le,” nga Hpakant PDF magam gun langai KNG shiga de tsun dan ai re.
Ndai laman Myen Hpyen dap ni, Seng Tawng maga de htu shadut taw nga ai majaw, KIA PDF shalawt da ai, Seng Tawng, Gwi Hka, Ta mahkan Mare maga de nga ai mung shawa hte KIO Asuya magam gun ni yawng, tsaw dik sadi maja na lam hpe tsun tawn ai lam ni nga ai hpe chye lu ai re.
Hpakant ginra kata shara law malawng hpe KIA KPDF dap ni lai wa sai 2024 shaning nnan daw hta htim gasat zing madu da lu wa ai rai nna, ya ten dai ginra ni hpe Myen Hpyen dap bai lu hkra shakut taw nga ai mung rai nga ai.
Lai wa sai April Shata hta, Myen Hpyen hpung ni htu lung wa ai ten, KIA maga hkap shingla gasat ai lam n galaw na matu tsun jahkrup bawng ban nna, lai lung wa ai gaw, dai Myen HPyen hpung ni Hpakant du ai hpang kaw na, shani shagu gasat gala lam ni byin taw ai mung rai nga ai.