Myen Hpyen Dap maga, Hpyen n-gun kaba hte htu shadut htim gasat nga ai majaw, Mandalay Myitkyina Lam kaba n tsa, Majan gasat poi byin taw nga ai lam, Mawdaw la ni kaw na chye lu ai.
Kanbalu Ginwang na ahkyak ai Byuha lam kaba n tsa ni hkan Myen Hpyen dap hte byusawhti hpyen n gun 400 daram htu shadut taw nga ai majaw, Majan n hpan lam ni byin taw ai re lam chye lu ai.
Ya Myen Hpyen dap htim gasat taw ai shara gaw, PDF dap maga up madu da ai ginra hpe Myen ni bai up madu lu na matu yaw shada let, htim gasat wa ai masa re lam, Mawdaw la langai KNG de n dai zawn tsun dan wa ai re.
“Myen Hpyen Dap maga gaw, Kanbalu Byuha lam mayan hpe bai up madu mayu wa ai majaw, htim gasat wa ai masa nga ai, Hpyen n gun ma grai law ai, Hpyen Dap hte byusawhti ni ma lawm ai,” nga tsun ai re.
Kanbalu Ginwang hte Hkin Oo Ginwang jarit mayan na ahkyak ai byuha lam hpe Myen Hpyen Dap the Byusawhti hpyen n-gun 400 daram the htu gasat taw ai lam, Infinity Group ni hta mung tsun tawn ai re.
Infinity Group tsun ndau da ai hta, Myen Hpyen dap ni gaw, dai Byuha lam kaba the Kanbalu ginwang na Nam koi lam rai nga ai Sabye Nan Tar mare Hkin Oo jarit Ye Kyi Oo mare baw du hkra, up madu na matu shakut taw nga ai re lam matut tsun da ai.
Myitkyina Mandalay lam lapran kaw, hkyak hkyak majan byin taw ai majaw, Mawdaw lam kaba yawng hpe pat da ai nga nna, Mawdaw la langai matut tsun dan wa ai re.
“Myen ni maga mi hku na hpyen n gun kaba hte htu gasat taw ai, lam n hpaw hkra galaw ai, dai zawn galaw na gaw, PDF dap maga na, mawdaw lam pat ai bai tsun, ngut na gaw, mawdaw la shada mung Phone line a tsawm n lu ai re nga yang gaw, mawdaw ni dai hku pat hkrum jawng taw ai ga rai nga ai,” nga na tsun ai re.
Maga mi de Majan a majaw, Mung shawa Si hkala lam ni mung nga taw nna, lai wa sai August 23 ya shani hta mung Kyi Kyin Mare makau kaw gap gasat hkat ai hta Mawdaw la marai 2 si hkrum wa ai re.
Dai sha n ga, Myen Hpyen dap hte Byusawhti dap ni Kanbalu ginwang kata na Mare Kahtawng 6 hpe mare shang nat jahten ai majaw, dum n ta 400 jan wan hkru hten za hkrum wa nna, mung shawa marai 9 sat hkrum wa ai lam, ကျွန်းလှတက်ကြွလှုပ်ရှားသူများ wuhpung ni kaw na tsun n dau da ai re.
Dai majaw, n dai ten laman Mandalay lam maga de hkrun lam hkawm sa ai lam rai n galaw shi na matu, PDF dap maga tsun n dau da ai re.