Shwegu kaw hkring da ai Myen Hpyen Hka Sanghpawli 12 Shwegu kaw na Manmaw maga de dai ni lai lung wa ai majaw, Sin Hkan Npu hka lam gyip ai shara hta laja lana gap gasat hkat taw ai lam chye lu ai.
Dai gap gasat hkat ai hta Myen Hpyen Dap maga na Nbungli bawm marang htu ai hpa sa sharu bun taw nga ai lam chye lu ai.
“Dai hpawt kaw na Hka Sanghpawli lai lung wa ai, Dai ni gaw shani ting, မြစ်ကျဉ်း kaw gap gasat hkat ai, Nbungli hpan hkum hte bawm sa jahkrat bun ai, Nbungli bawm Marang htu ai hpa she re.” nga shawng lam magam gun ni tsun dan wa ai re.
Dai Hka Sanghpawli 12 gaw, Shwegu kaw July 26 ya shani du ai rai nna, July 27 ya shani hta mung sanghpawli 3 Manmaw maga de man yawng lung wa ai hpe, KIA PDF dap maga hkap shingla gasat ai majaw, bai n htang yu mat ai rai nga ai.
Ndai laman shani shagu ngu na Hka sanghpawli lung wa ai hpe KIA PDF dap ni hkap shingla gasat ai majaw, Nlu lai lung wa hkraw ai mung rai nga ai.
Ndai laman Manmaw maga de lung wa na matu shakut taw ai Myen Hpyen Hka Sanghpaw 3 ram hpe Rawt malan dap maga gap jahten kau ya lu ai nga shawng lam magam gun ni tsun nga ma ai re.
Ndai lam hte seng nna, KNG maga na gaw, laksan a tsawm tup hkrak rai san shateng lu ai lam gaw n nga ai re.
Myen hpyen hpung ni n dai laman Shwegu kaw na Manmaw maga de Kawng lam, Hka lam lahkawng yan hku na htu shadut htim gasat lung wa na matu shakut taw nga ai rai nna, dai ni mung Shwegu Ginwang kata majan laja lana matut byin taw nga ai re.
Lai wa sai July 27 ya shani hta mung Shwegu kaw na, kawng lam hku na htu lung wa ai Myen Hpyen hpung ni hpe Ngabat Wa mare makau kaw hkap shingla gasat ai hta, Myen Hpyen dap maga hpyen hpung nawng, si hkala hkrum wa ai hpe Vedio ni hta mu lu ai re.
Myen Hpyen Dap maga Manmaw hpe n tat sum kau hkra Manmaw de lu sha hpyen laknak ni lu du hkra, ladat hkum hkra the shakut taw nga ai rai nna, KIA the pawng hpawm dap maga na mung Myen Hpyen Hka Sanghpawli Manmaw de n du wa lu hkra, Hka lam gyip ai shara kaw hkap shingla gasat taw nga ai re.