Manmaw Majan Laja Lana Gap Gasat Hkat Taw ai ten Myen Hpyen Dap Drone hte Laiza de Bawm wa jahkrat

KIA hte Pawng hpawm dap ni Manmaw mare kaba hpe laja lana htim gasat taw nga ai ten, Myen hpyen dap maga na Drone kaba hte KIA Ginjaw Laiza de bawm wa jahkrat bun ai lam Laiza ginra masha ni kaw na chye lu ai.
KIA hte pawng hpawm dap ni dai hpawt hkying 6 kaw na Manmaw hpe laja lana bai htim gasat nga ai hta Hpri gang dap dung (သံချက်ကာ တပ်ရင်း) hte Gumra dap shara ni hpe gasat zing la lu sai nga shawng lam hpyen shi sawk ni KNG de tsun dan wa ai re.
KIA hte pawng hpawm dap maga dai hpawt kaw na kalang bai n’gun dat gap gasat wa ai majaw, Manmaw shara shagu hta majan laja lana gap gasat hkat taw nga ai lam shawng lam hpyen shi sawk Salang langai KNG de tsun dan wa ai re.
“Dai ni gaw anhte kaw na bai agying htim gasat ai, Ts.K.Hk (21) Hk.L.Y (47), Dakkasu Jawng, သံချပ်ကာတပ်ရင်း shara shagu de htim gasat taw nga ai, သံချပ်ကာတပ်ရင်း hte သံချပ်ကာ mawdaw 4 hpe mung lu zing la sai, baw lapau langai hpe mung lu rim da ai,” nga shawng lam magam gun langai tsun dan re.

Dai hpawt gap gasat hkat ai Manmaw majan hta Myen hpyen dap maga na Dap Up Dukaba langai hpe mung lu rim tawn ai lam chye lu ai.
Manmaw majan laja lana gap gasat hkat taw nga ai lam hte seng na Dukaba Naw Bu hpe san shaga yu yang, dai hpawt manap kaw na gaw, n’gun dat kalang bai gap gasat nga ai lam gaw teng ai rai tim, dap shara zing madu lu ai lam hte gade ram gara hku sum machyi ai ngu hpe gaw a tsawm tup hkrak rai n chye lu shi ai lam tsun ai re.
“Dai hpawt hkying 6 ram kaw na ning gun dat gasat ai nga gaw na lu ai, rai tim mung ya du hkra gaw gade ram awng dang ai, hkrat sum ai, kata lam shiga gaw rai n lu la shi ai, anhte mung naw madat nga ai, သံချပ်ကာတပ်ရင်း lu zing ai nga shinggan kaw gaw tsun nga ma ai, rai tim anhte hpe tara shang shagrin ya ai lam rai n nga shi ma ai,” nga tsun ai re.
Ts.K.Hk 21 dap shara hpe KIA the pawng hpawm dap ni laja lana htim gasat nga ai ten, Myen hpyen dap maga na nbungli hpan hkum hte bawm wa sharu bun nga ai lam chye lu ai.
Myen hpyen dap nbungli bawm laja lana wa sharu bun ai majaw, Manmaw mare kaba yawng hten ma sai lam chye lu ai.
Manmaw hpe December praw 4 ya jahpawt kaw na htim gasat hpang wa ai gaw, ya n htoi 50 ya hkawt du wa ai ten, Manmaw muklum shara law malawng hpe KIA lu up madu da sai rai nna, ya naw matut ngam taw ai Myen hpyen dap shara ni hpe gasat shagrawt taw nga ai re.