Manmaw Majan Matut Gap Gasat Hkat Nga

Manmaw muklum hpe htim shagrawt gasat ai lam hta dai hpawt manap kaw na kalang bai majan laja gap gasat hkat taw ai lam shawng lam hpyen shi sawk ni kaw na chye lu ai.
January 23 ya jahpawt hkying 8 aten daram kaw na Manmaw 47 dap hpe sa htim gap gasat ai kaw na majan laja lana gap hkat hpang wa ai gaw, Nmawk lam maga na Deng 3,4 shara hte Manmaw Dakkasu jawng mayan de mung laja lana gap gasat hkat taw nga ai lam shawng lam hpyen shi sawk langai KNG de ndai zawn tsun wa ai re.
“Dai ni bai anhte kaw na htim gasat hpang sai, shara shagu de gap gasat ai, 47 de ma, Dakkasu maga de ma, Nmawk lam maga de ma gap gasat taw nga ai,” nga tsun dan ai re.
Manmaw htim shagrawt majan hpe 2024 December 4 ya jahpawt kaw na htim gasat hpang wa ai gaw, numdaw hte numdaw aten la na gap gasat taw nga ai re.
Manmaw majan hta KIA dap maga na Myen hpyen dap shara hpe htim gasat ai lam n galaw ai bat mi jan na ai hpang, dai hpawt manap kaw na kalang bai htim gasat ai masa re nga shawng lam magam gun the ni nawn ai ni tsun ai re.
KIA dap maga na Myen hpyen dap hpe htim gasat ai lam n galaw tim, Myen hpyen dap maga na nbungli hte Manmaw mare hpe shani shagu wa gap gasat taw nga ai re.
Ya ten, Manmaw Ginwang kata na Asuya magam gun law law Ts K Hk Myen hpyen dap kata pat hkrum taw nga nna, malu masha yak hkak dum hprut taw sai lam shawng lam magam gun hte ni nawn ai Salang Langai tsun ai re.
“ထွေအုပ်၊ လဝက၊ ဘဏ် zawn re hkan na Asuya magam gun အရာရှိ zawn re ni yawng Ts K Hk dap kaw wa hprawng yen taw ai rai nga ai, dai kaw hpyen la n re laga asuya magam gun ni mung Tsa lam nga ai da, Pawng hpawm dap mag ana Ts K Hk Myen dap hpe wang da yang gaw, Lu Sha kyet wa sai gaw,” nga tsun dan ai re.
Manmaw majan hpe dai hpawt manap kaw na kalang bai n’gun dat shakut taw nga ai majaw, mung chying mung shawa yawng kaw na mung kyuhpyi myit dum ya na lam shawng lam magam gun ni tsun ai re.