
Kanpaiti hpe Wunpawng Mungdan Shanglawt Hpyen Dap KIA Zing madu kau ai hpang, Miwa mung de na langu htaw mawdaw ni grai law shang wa ai majaw, ginra mawdaw la ni bungli n lu yak hkak taw nga ai lam, ginra mawdaw madu ni tsun ai kaw na chye lu ai.
Lai wa sai ten, Myen mung maga de Miwa langu htaw mawdaw tsep kawp n shang shangun ai rai tim, KIA dung ai hpang kaw na Miwa mawdaw ni grai shang wa ai majaw, ginra mawdaw madu ni bungli n lu mat ai nga ginra mawdaw madu langai KNG de ndai zawn tsun dan wa ai re.
“Mi nnan e gaw ya na Wungyi Chuk Hkyet Hting Nan သီးနှံ kaw naw nga ai ten, ginra madu ni bungli lu ra ai nga na, Miwa Mawdaw yawng hpe shapru kau na, Mungdan kata na mawdaw ni hkrai htaw taw ai rai nga ai, ya hte anhte Shanglawt maga na ni bai wa dung ai hpang kaw na gaw, Miwa mawdaw mung grai bai shang wa rai yang, anhte ginra madu mawdaw ni gaw bungli n lu mat, lama Miwa mawdaw ma hkra n pru mat shangun tim pyi Company Site langai kaw maw daw 5 htaw na nga yang, Mawdaw 3 ram gaw ndai ginra kaw na mawdaw ni hpe bang ai hku ni byin shangun mayu ai rai nga ai. Ya gaw yawng kaw shan hte Miwa mawdaw ni hkrai hkrai,” nga tsun ai re.
Miwa mawdaw grai shang wa ai majaw, ginra mawdaw ni bungli n lu mat ai hte, n kau mawdaw ni bungli lu ai rai tim htaw manu ni grai shagrit kau ya ai majaw, ginra daju mawdaw madu ni bungli matut kri na yak hkak taw nga ai re.

Ginra madu mawdaw ni hpe, Mawdaw kaba langai mi hta htaw manu hkying 8 sha masat ya nna, Miwa hkran de shang ai shaloi hta mung, Myen mung masha ni Miwa hkran de n mai gau shang ai majaw, Miwa de na mawdaw la ni hpe shap gau manu ni jaw ra ai majaw, ginra daju mawdaw madu ni yak hkak taw nga ai re.
Ya na zawn Miwa de na mawdaw law law shaga bang ra ai lam gaw, langu nnan pru wa ai ten, Myen mung maga de mawdaw n nga na shaga bang ai lam, Namsi Namsaw hte seng ai Jinghpaw mung na lit hkam salang langai tsun ai re.
“Company kaw na Langu ni ma hkra lu le yang she akyu hkam sha na re gaw, Mawdaw aten dep n du yang gaw langu ni myin lai wa ai le, myin lai mat yang gaw gadai n ra sai gaw, shaloi gaw, Company na ni Shan hte shaga bang wa ai rai nga ai,” nga tsun ai re.
Ndai lam hte seng na Kanpaiti na lit nga ai KIO Salang kaba ni hpe san shaga yu yang KIO maga ndai zawn matut tsun dan ai re.
“Dai hte seng na hpan mi hpan mi rai lu ai, Ndai hkran de nga ai ni hpan mi nga Miwa de bungli galaw lawm ai ni mung hpan mi nga, Hpaga hte seng na shan hte shada ahtu agawng nga grai nga hkat ma ai re. Miwa ni gaw Myen mung kaw mawdaw n nga na shang ai re nga, Myen mung kaw na ni mung ding yang pru shang rai nga ma ai,” nga tsun dan ai re.
Kanpaiti mare kaba hpe KIA dap maga 2024 ning November 20 ya shani zing madu kau ai hpang, Langu mawdaw pru shang lam ni ma hkra hpe KIO uphkang jum hpareng nga ai re.