Kokang MNDAA hte Myen hpyen dap gap hkat jahkring ai hpang, Sammung ginra na Miwa jarit chyinghka yawng bai hpaw sai rai tim, Myen mung masha ni Miwa mung de shang n mai ai nga Munggu ginra na mung shawa langai KNG shiga dap de tsun dan wa ai re.
Munggu hte Man Hai jarit chyinghka kaba hpe January 18 kaw na bai hpaw sai rai tim, Myen mung maga na Kumshu hta lai na hpa n mai shalai dut sha ai lam ndai zawn tsun dan wa ai re.
“Ya gaw Miwa mung na masha ni mai shang mai pru ai, anhte maga na gaw n mai ai, anhte maga na gaw Kumshu hta lai na hpa n mai shalai ai,” nga Munggu ginra na amyu shayi langai KNG de tsun dan wa ai re.
Miwa hkran maga de na gunrai bai shang wa ai majaw, gunrai manu ni mung yawm wa nna, mung shawa ni galaw lu galaw sha lam hta mung n gun lu masan sa taw ai lam matut tsun dan ai re.
Ya na zawn gap hkat jahkring da na jarit chyinghka ni bai hpaw taw sai rai tim, maga mi de bai gap gasat hkat wa na hpe galoi mung hkrit maja taw ra ai lam matut tsun ai re.
Miwa maga de na, masha lang gunrai nkau hte malu masha ni bai shang taw sai majaw, shawoi 90, 100 jaw na mari lang ra ai arung arai ni ya gaw 40, 50 ram manu yawm mat sai lam chye lu ai.
Miwa jarit chyinghka hpaw dat ai hte rau, Miwa mung maga de na tara n shang Mawdaw Sengke ni Myen mung maga de lagu shalai taw ai hpe Myen hpyen dap rim ahkyak la na, gumhpraw hte bai shaw la shangun taw nga ai nga Muse ginra masha ni kaw na chye lu ai.
Ya ten Muse kaw gaw, ka-ang na Nandaw chyinghka hte Sin hpyu pauk chyinghka lahkawng hpaw na, gunrai ni ding yang ginlen hkat taw nga sai re.
Jarit chyinghka hpaw ai hte rau tara n shang ai arung arai ni mung pru shang lam ni nga taw nna, Pyithutsit hte pawng na galaw sha taw ai lam ni mung nga taw ai hpe chye lu ai.
“Ya gaw Miwa mung na Mawdaw nnan ni shang taw ai, dai hpe Myen ni gaw bai rim, gumhpraw hte bai shaw la shangun rai taw ai, Pyithutsit ni hte jawm galaw sha taw ai ga rai nga ai,” nga Muse ginra na Salang langai KNG de tsun ai re.
Muse Jegau jarit chyinghka masum nga ai kaw na, Magwi Hpraw dung ai maga hte lapran na Nan-daw chyinghka kaba ni gaw hpaw sai rai tim, Man Wing maga na gaw miwa shaning ningnan ngut ai hpang she hpaw na re lam sagawn chye lu ai.
