Shiga

Hpawng Seng Ginra na KIA Dap shara langai hpe Kokang ni sa hpya kau ya

Mungmyit Sinli Hpawng Seng Ninghtawn Nawng Hpai mare na KIA dap shara langai hpe Kokang MNDAA dap ni hpyen n’gun hte sa wa na sa hpya kau ya ai lam chye lu ai.

Dai dap shara gaw, Munggu Ginwang daw masat (4) Dap kung kata na Ginra makawp Hpyen Hpung (GMH) hte PDF dap ni nga ai dap shara ginsum shat gawk ni yawng hpe sa hpya kau ya wa ai rai nga ai.

January 14 ya jahpawt hkying 11 chyen ten daram hta Munggu mare kaw nga ai Kokang MNDAA dap ni 4 Wheel mawdaw 4, hpyen n’gun 50 hte lung wa na n tsa matsun re nga na wa hpya kau ya ai nga dai ginra na lit nga ai salang langai KNG de tsun dan wa ai re.

Kokang MNDAA dap ni kaw na ya na zawn KIA dap shara ni hpe sa adup hpya kau ya wa ai lam gaw, shan hte gap gasat zing da ai shara re majaw, yawng shan hte matsun n pu kaw galaw ra ai, nga ra ai ngu masa hte ya na zawn dap shara ginsum ni hpe sa hpya kau ya ai masa re nga ndai zawn tsun dan wa ai re.

Ya gaw Kokang Miwa ni ndai Lashio lahta daw ma hkra gaw shan hte gap di tawn ai shara re majaw, shan hte na shara re ngu wa ai ga rai nga ai, anhte hpe gaw shan hte a matsun n pu kaw sha nga shangun mayu ai ga rai nga ai. ya the sha ndai zawn rawt malan hpu nau shada lapran kaw mang hkang  n shabyin na atu kaba ai ni hkrum jahta da ai rai nga ai,” nga KIO salang kaba langai KNG de tsun dan wa ai re.

Mungmyit Sinli ginra hta rawt malan hpunau shada kata kaw mang hkang n tam hkat na matu, lai wa sai December hpang jahtum bat hta n tsa na masha kaba shada jahkrup bawngban da hkat ai lam nga ai hpe chye lu ai.

Manghkang n byin na matu shada bawng ban jahkrup da ai hkat shata mi pyi rai nna shi ai ten ya na zawn, dap shara ni hpe masha hkum nan sa nna, sa hpya kau ya wa ai mung rai nga ai.

Man Dung Ginwang kata na KIA dap shara rai nga ai Pan Hka Lay hte Man Mawk dap shara lahkawng hpe Dai ning January praw 1 ya shani hpang jahtum yen ya na matu Balawng TNLA dap kaw na tsun wa ai hpang, shada n pu tsang hta kahtik kahtawk mang hkang ni byin nga ai re.

Related Articles

Back to top button