Majan ShigaShiga

Manmaw majan hta Myen hpyen dap maga shawoi lang ai nbungli bawm hta grau kaba ai nbungli bawm ni hpe lang wa

Manmaw majan hta Myen hpyen dap maga na shawoi lang ai nbungli bawm hta grau grau kaba ai bawm ni hpe lang wa taw nga ai nga, shawng lam magam gun hte ni nawn ai Salang langai KNG de tsun dan wa ai re.

Ndai Shaning ningnan hpang kaw na KIA hte pawng hpawm dap maga na n-gun grau shadat gasat wa ai hte rau Myen hpyen dap maga na mung shawoi lang taw ai nbungli bawm hta grau kaba ai nbungli bawm ni hpe lang wa ai majaw, Manmaw mare kata na mung shawa dum n ta ni grau grau hten za law taw nga ai re.

“Manmaw majan hta dai ni hkan na gaw Myen ni nbungli bawm grau grau kaba ai she lang wa nga ai, nbungli lang magang gaw Manmaw gaw ayai magang re ga rai nga ai,” nga tsun dan wa ai re.

Manmaw Myen hpyen dap Ts.K.Hk 21 hte HK.L.Y 47  dap shara ni hta laja lana htim gasat hkat taw nga nna Myen hpyen dap maga na mung laknak kaji kaba ni hte ding yang naw ninghkap shingla gasat taw nga ai lam shawng lam hpyen shi sawk ni kaw na chye lu ai.

Ya ten Ts.K.Hk 21 a shawng lam makawp dap shara n kau hpe KIA hte pawng hpawm dap ni madu da lu ai lam ni nga ai nga, shawng lam magam gun ni kaw na chye lu ai.

Manje ginra yawng hpe Myen hpyen dap tat sum kau ai hpang Manmaw muklum kaba n hkrat mat hkra Myen hpyen dap maga na laknak kaba hpan hkum, nbungli laknak hpan hkum ni hte ninghkap shingla gasat taw nga ai re.

Ya ten Manmaw muklum kata hta Myen hpyen dap maga hpyen n’gun garum ai lam hpa mung n mai shang mat sai rai na, nbungli pa hpe mung dap hpawm maga zing madu da sai majaw, nbungli mung yu lung n mai mat sai re.

Ya na zawn Manmaw mare kaba tat sum wa na masa lam a majaw, Myen hpyen dap maga na Manmaw mare kaba hpe n tat sum kau hkra nbungli hpan hkum hte makawp shingla gasat taw nga ai mung rai nga ai.

Related Articles

Back to top button