Majan ShigaShiga

Danai Lapu Hka Jamaw sa lam Tsan Lun Gat Seng len hta Myen hpyen dap nbungli bawm wa jahkrat

Mung Shawa marai 20 si nna marai 15 hkala

January 11 ya shani ka-ang 11 chyen ten daram hta Myen Hpyen Jet Fighter nbungli langai hte Danai Lapu Hka Ja Maw sa lam Nambyu hka mahkrai pawt na Tsan Lun mare Gat Seng len hta nbungli bawm lahkawng wa jahkrat bun ai majaw mung shawa marai 20 asak si hkrum wa nna marai 15  hkala hkrum ai lam KIO Shiga lawk hta tsun ndau da ai re.

Dai ginra hta majan byin ai lam hpa n nga tim mara kata mung shawa ni kanbau bungli galaw sha nga ai, Gat Seng len hta wa jahkrat ai majaw, mung shawa si hkala law wa ai re.

Myen hpyen dap nbungli bawm lahkawng wa jahkrat ai hta, gat seng 9 yawng hten agrawp mat nna, si sum ai law malawng amyu shayi rai nna, asak kaji dik laning mi re ma kaji langai mung lawm ai lam chye lu ai re.

Myen hpyen dap maga na ya na zawn Ja maw ginra de nbungli bawm wa jahkrat bun ai gaw, KIA a shang gumhpraw hpe hkum pat mayu ai lam a majaw re nga, mung masa yu maram nga ai salang langai KNG de ndai zawn tsun maram da ai re.

“Madung gaw Shanglawt ni a shang gumhpraw nga ai ngu shadu ai shara ni hpe gasat wa ai ga rai nga ai, tsun ga nga yang Ja gumhpraw lam pat ai ngu mai tsun ai ga rai nga ai, Shanglawt na madung Ja gumhpraw shang ai mung Hpakant Lung Seng maw hte Ja Maw na re nga yang dai lahkawng hpe masat shatai na, galaw wa ai ga rai nga ai,” nga tsun ai re.

Si hkrum ai ni hpe lup makoi da ai

Myen hpyen dap nbungli bawm wa jahkrat ai shara gaw, Danai mare kaba the Deng 20 daram tsan ai Lapu Hka Ja Maw hte Pat maw de sa wa ai lam shara hta re lam chye lu ai.

Majan sum nga ai Myen hpyen dap gaw, Jinghpaw mung shara law law na Ja maw lung seng maw shara ni hpe tat sum kau ma wa ai majaw, shan hte kaw lani hte lani shang gumhpraw ni yawm wa ai majaw, ya na zawn hkrup mara bawm jahkrat bun hkawm wa ai re nga ginra masha n kau tsun maram nga ma ai re.

Dai ginra yawng hpe Myen hpyen dap kaw na 2017 ning hta hpyen n’gun kaba hte htim gasat zing madu kau ai dap maw ginra rai nna, Myen hpyendap daru magam zing kau ai hpang 2024 ning kaw na Wunpawng Mungdan Shanglawt Asuya kaw na bai yu reng nga ai maw ginra rai nga ai.

Myen hpyen dap ni kaw na lai wa sai 2022 ning October 23 ya shana hta mung Hpakant Anang Pa hta nbungli bawm wa jahkrat bun ai majaw, KIO magam gun hte mung shawa marai 60 jan asak si sum wa sai re.

Related Articles

Back to top button