Hpakant Nbungli the wa gap ai hta mung shawa marai 7 si nna, marai 6 hkala hkrum

Hpakant San Hka mare hte Mazup Yang mare hta Myen hpyen Jet Fighter nbungli hte bawm wa jahkrat bun ai majaw, mung shawa marai 7 asak si hkrum nna marai 6 daram hkala hkrum wa ai nga, Mazup Yang mare na Salang langai KNG de tsun dan wa ai re.
Dai hpawt manap hkying 10 chyen ten daram hta Mandalay Tada-Oo na pyen lung wa ai Jet Fighter nbungli langai hte San Hka mare hte Mazup Yang mare ni hta bawm 6 lang wa jahkrat bun ai majaw, mung shawa si hkala lam nga wa ai lam ndai zawn tsun dan ai re.
“Jet Fighter hte dai hpawt hkying 10 chyen ram hta wa gap bun ai, sa wa ai de masum jahkrat kau da na, bai nhtang wa ai hta mung masum bai jahkrat kau da ai re.Nbungli bawm gaw mazup yang manau wang a sinna mawdaw lam kaba hta langai wa hkrat ai, dai kaw marai 3 kalang ta si ai, ngut na San Hka mare မြင့်မြတ်သူ garum gahtau rung nta makau hta 2 wa hkrat na, Dama Yung hta langai wa hkrat ai, si ai gaw ya du hkra rai yang marai 7 re ga rai nga ai, lungseng htu nga ai kaw mung wa hkrat ai dai kaw nkau hkala ai, hkala ai gaw marai 6 ram re ga rai nga ai, dai ni gaw grai wa tsang ra ai lam n nga ai” nga Mazup Yang mare na Salang langai KNG shiga de tsun dan wa ai re.
Myen hpyen dap wa gap bun ai nbungli bawm Mazup Yang mare hta 3 wa wa hkrat nna, Mazup Yang Manau wang a sinna mawdaw lam kaba n tsa langai, Myetsa bum sa wa lam kaw langai, Mya U Yin Company Wang hta 1 wa hkrat ai lam chye lu ai.
Nbungli bawm a majaw, San Hka mare na mung shawa marai 4 si nna Mazup Yang Mye Tsa bum sa wa lam kaw marai 3 si ai rai nna, hkala ai gaw, marai 5 ram re lam ginra masha ni tsun ai re.
Myen hpyen dap nbungli bawm wa jahkrat ai majaw, San Hka mare na mung shawa n kau nta chyinghka la na, hprawng yen ai ni mung nga ai rai tim, Mazup Yang mare na mung shawa ni gaw mi na hte raw sha gara de mung n hprawng ai nga taw ai lam chye lu ai.
Hpakant ginra hta lai wa sai 2024 ning June shata hpang kaw na majan byin ai lam n nga mat sai rai tim, Myen hpyen dap maga ya na zawn mara kata bawm wa jahkrat bun ai lam rai nga ai.
Majan byin ai lam n nga tim, Myen hpyen dap maga na ya na zawn nbungli bawm wa jahkrat bun ai lam a n tsa, ginra masha ni myit sawn n lu, majan bai laja wa na kun? myit tsang let nga taw ra ai lam ginra masha ni matut tsun dan wa ai re.