KIA ni htim gasat zing kau sai Lang Se mare de Myen hpyen nbungli bawm wa jahkrat ai hta Ma 3 asak si hkrum
Jinhpaw mung a Sinpraw dingdung maga, Miwa ga jarit, Ja Nlung pru dik ai ginra Lang Se the Gang Fang mare lapran na, သထုံကျင်း ngu ai Rawang mare hpe Myen hpyen dap maga nbungli bawm wa jahkrat bun wa ai majaw, Ma marai 3 hte Wa langai si ai nga, dai ginra de du kau da ai magam gun ni tsun ai re.
Myen hpyen dap maga Gang Fang the Lang Se lapran na သထုံကျင်း ngu ai mare hta November 18 ya shana maga de hkying 2 ten daram hta n bungli bawm wa jahkrat bun ai majaw Ma kaji marai 3 si hkrum wa sai re.
“Hpa majan byin ai lam mung n nga ai, Ja gri pru ai shara re nga yang gara hku shadu ai kun? Lang Se kaw nan wa jahkrat ai n re sha, Ta Htung Jin ngu ai Rawang mare kasha kaw wa jahkrat ai, dai kaw ginsup nga ai Ma marai 3 hte nta kaw rem da ai n’ta Wa langai si ai nga tsun ai,” nga dai ginra du da ai magam gun langai tsun ai re.
Lang Se mare gaw, Ja Nlung pru dik shara langai rai nna, dai ginra hta Dang Gu Tang hte Lagwi Bawm Lang woi awn ai Pyithutsit wuhpung lahkawng dung let hkawn kang hta sha ai shara rai nna, Wunpawng Mungdan Shanglawt Hpyen Dap KIA hte PDF pawng hpawm dap ni November 10 ya shani sinat kalang mung n shangoi ai sha, jahkrup bawng ban la nna, zing kau lu ai shara re.
Ya ten dai ginra hta KIO Uphkang Sai ru hkrang shapraw na matu galaw taw nga ai aten ladaw rai nna, ya ten dai ginra hta hpa majan n hpan mung n nga sai sha, mung shawa ni sim sim sa sa hte Ja htu sha nga lu sai lam, dai ginra du kau da ai magam gun ni tsun dan ai re.
