Pang Wa mare the Deng 2 ram sha tsan sai, Nga Law mare shinggan hta dai ni mung majan laja lana matut gap gasat hkat taw nga ai lam, hpyen magam gun the ni nawn ai ni tsun ai re.
Majan byin ai shara de Pangwa Myen hpyen byuha dap kaw na laknak kaba ni the laja lana gap bun taw nga ai lam matut chye lu ai.
“Pangwa myo hpe n gap na matu Miwa Asuya mi tsun ai nga tim Pangwa Byuha dap kaw na laknak kaba ni hkrai gap bun nga yang gaw, gasat wa na re,”nga hpyen masa yu maram ai ni tsun ai re.
October 15 ya shani Lu Pyi Jarit sin dap hpe htim gasat zing madu kau ngut ai hpang, Pang Wa maga de majan man bai gayin wa ai gaw, shani shagu majan laja lana gap gasat hkat taw nga ai re.
Ya na zawn mare kaba makau ni de gap gasat hkat wa ai majaw, mung mare masha yawng miwa jarit mayan de hprawng yen nga nna, Miwa maga na chyinghka pat da ai majaw, mung shawa hkying lam jam jau hkrum taw nga ai re.
Mani October 17 ya shani hta mung, Lagwi, Zuk Lang, Chang Ying Hku mare ni de gap gasat hkat wa ai re.
Ya ten Miwa Asuya maga de na KIA dap hpe Pang Wa the Kanpaiti muklum ni hpe htim gasat ai lam n galaw na matu tsun da ai lam nga ai hpe, lit nga ai lapran salang ni kaw na chye lu ai re.