Pinlaybu mare kaba hpe KIA the PDF pawng hpawm dap ni htim gasat zing madu
Sagaing gira, Pinlaybu mare kaba hpe KIA hte PDF pawng hpawm dap maga, October 8 ya jahpawt hkying 5 daram hta yawng zep zi htim gasat zing madu kau lu sai lam, shawng lam magam gun ni tsun ai re.
Pinlaybu hpe KIA hte PDF pawng hpawm dap maga htim gasat zing madu ngut ai hpang Myen hpyen n bungli hte laja lana matut gap bun wa ai re.
Nbungli hte wa gap bun ai hta, Jet Fighter nbungli 4 hte wa gap sharu bun ai rai nna, Pound 300 kaba ai laknak kaba si ni hte mung wa jahkrat bun ai lam shawng lam magam gun ni matut tsun dan wa ai re.
“Dai hpawt hkying 5 daram hta Pinlaybu yawng hpe gasat zing madu la ngut ai hpang, Myen hpyen nbungli 4 hte agying wa gap bun ai, dai hpawt daw maga sha pyi 7 lang da bat rai sai, ya gaw shan hte Myen hpyen dap n nga sai re nga jang gaw, kam ai hku wa gap sharu bun ai ga rai nga ai,” nga tsun dan ai re.
Sagaing Kawlin muklum a Sinna dingdung maga deng 25 tsan ai Pinlaybu mare kaba hpe KIA hte PDF pawng hpawm dap maga lai wa sai 2021 ning Myen hpyen daru magam zing kau ai hpang, muklum htim shagrawt majan hpe jahkring hkring gasat wa ai hta, ndai kalang yawng zep zi zing madu la lu sai re.
Lai wa sai 2023 ning November shata hta mung dai mare kaba hpe kalang htim gasat zing madu la lu wa yu sai rai tim, Myen hpyen dap maga n bungli hpyen n gun kaba hte bai htu shadut htim gasat wa ai majaw, shata mi jan na ai hpang bai tat sum kau ai rai nga ai.
Pinlaybu hpe tat sum kau ai shata 7 na ai hpang, August 14 ya shani kaw na KIA hte PDF pawng hpawm dap maga numdaw kalang bai htim gasat hpang wa ai gaw October 8 ya jahpawt hkying 5 daram ten hta yawng zep zi bai htim gasat la lu sai nga shawng lam magam gun ni tsun ai re.
“maning mung kalang gaw lu la sai shara rai nga ai, lam amyu myu a majaw bai tat sum kau ra mat ai, ndai kalang gaw shan hte maga sum machyi ai lam mung tsawm ra law mat sai, ya gaw anhte maga bai tat na lam n nga sai.” nga tsun ai re.
August shata praw 8 ya shani kaw na kalang bai htim gasat hpang wa ai gaw, shata mi laman hta, Myen hpyen nbungli hte hpyen n gun laknak arung arai, 3 lang wa htaw sa wa ai re.
“Shawng ningnan lang nbungli hte sa sa ai hpyen hpung ni gaw, yawng laknak jahkrat na hpung shang mat ai, numaw lahkang lang hta bai sa sa ai hpung ni hpe gaw law malawng jahkrung lu rim ai, Ya mulum lu zing ai ten du hkra rai yang Myen hpyen la marai 120 ram hpe rim woi da ai,” nga tsun dan ai re.
Ndai kalang Pinlaybu majan hta Myen hpyen dap maga na Y-12 nbungli hte lani mi hta lahkawng ding yang sa gap bun nna, shawoi hkan na majan hta grau laja ai lam chye lu ai .
Pinlaybu majan hta Myen hpyen dap maga, Magwi မြို့စောင့်တပ်, ၅၀၅ Hpungkyi Saradaw na Pyithutsit, Sam HKyeng SNA dap, ပျူစောထီး hpyen hpung ni shang lawm gasat wa ai re.
