Nawnglut ginwang kata na hpyen yen mung shawa ni, hpyen yen aten ladaw na wa ai the rau hkawm sa hkawm wa yak hkak ai hte malu masha tsi mawan dum hprut taw nna, yakhkak taw nga ai lam hpyen yen mung shawa ni tsun ai re.
Lai wa sai June shata daram hta Indawgyi ginra kata ,Nyawng Pin, Waylung, Chawng Wa, na Myen hpyendap shara hpe KIA htim gasat zing madu kau ai hpang, Namawn hte Mai Nawng mare makau grupyin hkan na mung mare masha ni yawng hprawng yen mat ra ai re.
Dai ginra na hpyen yen mung shawa hkying 3 jan gaw ya ten nam de hprawng yen taw nga nna, Sam HKyeng PYithutsit ni ladu lai san jep ai majaw hte Tsi mawan lusha ni yawng hpe shalai na ahkang n jaw hkum pat da ai majaw hpyen yen mung shawa ni yakhkak jam jau tsun yam hkru nga ai lam hpyen yen mung masha langai KNG de tsun dan wa ai re.
“Lai wa June shata 24 ya shani kaw na Namawn mare lahta Nyawng Pin, Waylung, Chawng Wa, mare ni de majan laja wa ai majaw, anhte Namawn mare ni mung nga n mai wa na hprawng yen mat ai, ya gaw majan gaw n nga sai, raitim mare kaw Sam Hkyeng Pyithutsit dap n inga taw ai majaw n mai wa shi taw nga ai, ngut na Tsi mawan malu masha ni hpe mung n shalai ma ai, dai majaw nam de hprawng yen taw nga ai an hte hpyen yen mung shawa ni gaw lani hte lani grau grau yak wa taw nga ai, “ nga tsun dan ai re.
Hpyenyen ladaw na wa ai hte rau, koi yen ai shara ni hta , hpyenyen garum ntum nlu ai sha n-ga , lawm sa ai malu masha ni mung ma mat ai majaw, hpyeyen garum ntum ra kadawn nga ai lam matut tsun dan wa ai re.
Ya ten Indawgyi ginra ni hta Jinghpaw mying mying nna, lai hkawm sa ai mung masha ni hpe, ladu shalai san jep ai lam ni, dum n’ta ni hkan mara kata san jep ai lam ni galaw taw nga ai majaw, Namawn hpyenyen mung masha ni gaw dum nta n-gwi wa ai lam mung rai nga ai re.
Hpyenyen mung shawa ni madung ra kadawn nga ai lam gaw, malu masha , tsi mawan hte , sak kaba sai gum gai , dingla ni a matu, bai, ma kaji hte mahkum kanu ni amatu n-gun rawng ai malu masha ni madung ra kadawn nga ai lam tsun dan ai re.
Hpyen yen mung shawa ni gaw , malu masha mayak hkrum sha nga ai lapran kaw maga mi de, Indawgyi kata hpyen masa lam ni ding yang kahtet nga ai majaw malu masha nlu ai sha, kajawng kaja bai hprawng koi yen hkawm ra mat na hpe myit tsang nga ma ai re.
