Majan laja taw nga ai Sengtawng mare hta mung shawa marai 30 daram gap sat da hkrum ai lam Hpakant ginra masha ni tsun ai re.
Dai gap sat hkrum ai mung shawa ni gaw Lucky Man Hotel kaw nga taw ai Myen hpyen hpung ni kaw na Sniper hte gap sat da ai ni law malawng rai nna, nkau gaw lahkawng maga gap gasat hkat ai ten lak nak kaba hte si hkrum ai ni mung lawm ai lam, Hpakant ginra masha langai KNG shiga dap de tsun dan ai re.
“ Myitut mu ai hpe tsun ga nga jang Myen hpyen dap gaw lak nak kaba ni hte gap sat ai, nbungli hte bawm jahkrat bun ai, Lucky Man Hotel kaw rawng ai Myen hpyen ni sniper hte gap ai dai zawn rai, n dai laman sha lam de hkawm sa ai mung shawa ni hpe gap sat ai marai 30 daram rai sai, ya du hkra n kau mang ni hpe n lu sa hta la shi ai.” nga tsun ai re.
Lam n tsa kaw taw ai mang ni hpe gadai hpe mung nsa hta sha ngun ai majaw lam n tsa dai hku yet manam taw nga nna, n’ta n kau mung dai hku ding yang nat hkrum taw nga ai re.
September 17 ya shani du hkra rai yang Sengtawng mare kata gap sat da hkrum ai marai 30 jan ram nga ai rai nna, dai hta law malawng mung shawa ni rai nna, magam gun n kau mung lawm ai re hpe chye lu ai.
Dai sha n ga, Myen hpyen dap hte Sam hkyeng SNA dap ni pawng nna, mung Shawa dum nta nat jahten ai lam ni galaw taw nga ai majaw Sengtawng mare lawk 4 na mung shawa dum n ta 400 ram wan nat jahten hkrum taw sai lam chye lu ai.
September praw 7 ya sha ni kaw na Sengtawng mare hta majan gap gasat hpang wa ai gaw, n htoi 6 ya na ai hpang Sengtawng mare Myen hpyen Balik dap hpe KIA hte pawng hpawm dap ni zing madu kau ai hpang Myen hpyen dap nbungli hte wa gap bun ai kaw na dai ginra hta majan grau laja wa ai rai nga ai.
“Dum n’ta wan hkru hten ma ai hpe maram yu yang n’ta 400 hte 500 daram rai na re ngu maram lu ai, dai zawn wan hkru ai gaw madung Myen hpyen dap ni kani ya ni hpe gumhpraw jaw na n’ta hkan nat shangun ai majaw rai nga ai.’ nga Sengtawng ginra masha langai tsun ai re.
September 17 ya shana maga de hkying 5 daram hta mung Yuma mare maga de n ta wan hkru taw nga ai nga matut tsun dan ai re.
Ya ten Lucky Man Hotel hta rawng nga ai Myen hpyen hpung ni hpe KIA dap maga wang da ai majaw Myen hpyen dap maga na ya na zawn dum n’ta nat jahten shangun ai masa re lam ginra mash ani tsun ai re.
Sengtawng mare hta ya ten du hpyen masa matut shaja hkat nga nna, mung shawa gadai hpe mung rai n shang shangun ai re.
