KIO uphkang ginra Myitsone lahta Njang Yang mare hta sut hpaga galaw ai shang wa nhtawm, lamu ga law law hta ja htu sha nga ai lam chye lu ai.
2023 ning November shata Myen hpyendap yawng Njang Yang kaw nna hting nut mat wa ai hpang, ya na zawn KIO uphkang npu ja maw law wa ai lam rai nga ai.
Masa lam hpe chye ai ginra masha langai “Ja htu shaw ai lam grau law wa nga ai. Shawng de Injanyang grup yin hpyen dap nga ai shara ni hta ja htu shaw ai lam grai n nga ai. Raitim, ya gaw shara shagu ja htu shaw nga ma ai. Myen ni pru mat wa ai hpang, ja htu ai lam law wa ai.Shawng nnan mare kahtawng ni htap ni ai shara ni hta n htu ma ai.Raitim ya gaw kahtawng ni hte ai shara kaw du hkra ja htu shaw nga ai.” nga nna Njan Yang buga mare masha langai tsun ai.
Ya ten Njang Yang ginra hta ja htu sha ai ni gaw ginra masha ni n re ai sha, shinggan de du shang wa ai hpaga la ni re hpe chye lu ai.
“Buga masha nkau gaw tinang a yi sun hte lamu ga ni hpe hpa myit tsang ai lam n nga ai sha dut sha kau ma ai.Raitim, nkau mi gaw htawm hpang de gara shara kaw mung bungli n lu sha, n lu sha yang gara hku nga lu na hpe myit tsang nga ma ai.Ndai zawn grai law hkra ja htu ai majaw, daining grau sawng ai hka kaba ai lam ni mung byin wa sai.Mai byin yang, KIO/KIA ni mung shanhte jahkrat da ai tara hpe hkan ra ai,buga masha ni myit nhkrum ai shara hta gaw nhtu yang kaja na re.” nga nna Njang Yang mare masha langai tsun ai.
Lai wa sai 2018 ning hta Myen hpyendap hte Wunpawng Mungdan Shanglawt Hpyen Dap KIA lapran majan byin ai majaw Njang Yang buga masha ni gaw Myitkyina de hprawng yen mat ai re.
Ya yang Njang Yang mare kata Myen hpyendap hting nut mat sai raitim, buga masha ni gaw dum nta n lu gawgap la shi majaw mare de n lu wa shi ai lam chye lu ai.
Myen hpyen daru magam zing kau ai hpang, ja htu shaw ai lam, grau law wa ai shara ni gaw, Njang Yang, Sumprabum,Putao, Malihka makau hkan rai nna jak kaba ni hte laja lana htu taw nga ma ai re.
2018 ning hta majan rai n byin shi yang, Njang Yang mare hta nta htinggaw 100 jan nga ai.
