Shiga

Rage MMA, Semi Final Htwi Shingjawng Lamang Hta Joseph Sut Du Aung Awng Dang

Malaysia daju, RAGE MMA amateur madang Champion ningnan gashun shingjawng poi hta Wunpawng Amyusha Joseph Sut Du Aung gaw semi-final hta awng dang nna Final shingjawng lamang de du sai re.

Shingjawng poi hpe July shata 20 ya shani Malaysia mungdan Kuala Lumpur, Lalaport shopping mall hte Cage kaw galaw ai rai nna, Joseph Sut Du Aung gaw shi a shingjawng manang Malaysia amyusha Galvin Steven hpe minute 1:57 laman, htwi dang kau ai re.

“Pyaw ai daram gaw pyaw ai. Ngai na pressure gaw hpang na kalang she re majaw ndai poi gaw dai ram nre shi ai hpang na poi she grau pyaw na ngu hkam sha ai.” nga nna Joseph Sut Du Aung (Joseph Sut Du Aung).

Champion ninggang gashun lamang, final poi gaw du na September 7 ya shani re lam chye lu ai.

Joseph Sut Du Aung gaw kickboxing ginsup hpan poi alang 6 hta 3 lang dang nna 3 lang sum da ai re. Bai nna Rage mixed martial arts (MMA) ginsup poi 3 hta 3 lang tup dang da ai re.

Mungkan galai shai wa ai hte social media ni chyam bra wa ai hte maren, mixed martial arts (MMA), boxing, boxing, Muay Thai zawn re ai htwi htawng ginsup hpan ni mung ramma ni grau grau ra sharawng wa nga ai.

Joseph Sut Du Aung gaw 1997 ning February shata (15) ya shani Yangon, Thankankyun kaw shangai nna kaba wa ai re.

Shi hta kahpu kanau marai 7 nga nna, kaji dik htum re lam chye lu ai.

Shi gaw kaji ten kaw nna karate ginsup hpan hpe gasup wa nna, Malaysia de bungli galaw na matu du wa ai hpang, 2020 ning grup yin kaw nna gaw kickboxing hte wrestling zawn re ai shingjawng hpan amyu myu hpe sharin ginsup hpang wa ai re.

 

Related Articles

Back to top button