Nawng Cho, Kyauk Me, Ti Paw, Mogok Mare Kaba ni hpe Balawng TNLA hte PDF pawng hpawm dap ni htim gasat nga
Lahta Sam Mung, Nawng Cho, Kyauk Me, Ti Paw, Mogok Mare kaba ni hpe Balawng TNLA hte PDF pawng hpawm dap ni htim gasat taw nga ai majaw, majan laja lana matut byin taw nga ai lam chye lu ai.
Lashio hte Pyin Oo Lwin lapran na Nawng Cho, Kyauk Me mare kaba ni hpe Balawng TNLA dap hte PDF pawng hpawm dap maga mare kata asuya magam dap rung nkau hta shara la da lu sai rai tim, dai makau na Myen hpyen dap kaba langai hpe mung htim gasat zing lu ai lam rai nnga shi ai lam Balawng dap na lit nga ai ni KNG shiga dap de tsun dan ai re.
“Naung Cho, Kyauk Me ni de Majan laja lana matut byin nga ai, Myen hpyen dap langai hpe mung lu zing la ai lam rai n nga shi ai, myo kata na asuya rung hte balik dap n kau hpe chyawm lu zing da sai, Myen hpyen dap kaba ni hpe matut htim gasat taw nga ai,” nga tsun ai.
Ya ten da mare kaba ni hta Myen hpyen dap kaba ni naw ngam taw ai majaw, lu zing lu ai madang rai n rai shi na majan matut laja taw nga ai re.
Kyauk Me hte Nawng Cho mare kata ni hta, Balawng TNLA dap hte PDF pawng hpawm dap ni shara jahkrat nga taw ai lam chye lu ai.
Nawng Cho Mare kaba na Balik Dap, Municapal, Lamu Marang yu maram rung, Hpyen Magam gun Usa rung hte Wan sat dap, Tsi Rung kaba zawn re ai Asuya rung ni hta Balawng TNLA hte PDF pawng hpawm dap ni shara shang la taw sai lam ginra masha ni tsun ai re.
Nawng Cho mare kaba hta Myen hpyen dap Hk.M.Y 114, 115, hte 117 dap kaba ni matut nga taw ai rai nna, ya ten dai dap kaba ni hpe matut htim gasat taw nga ai re.
Mogok mare kaba hta gaw Myo hte naw tsan ai shara ni hta gap gasat hkat taw ai rai nna, Kyauk Me hte Ti Paw myo makau ni hta nan gap gasat hkat taw nga ai re.
Dai shara ni hta majan gaw matut laja taw nga ai rai nna, dap shara ni lu zing la ai lam ni gaw rai n nga shi ai nga, Balawng TNLA dap na tsun n dau da ai re.
Ya ten majan byin ai shara n kau de Phone Internet line pat da ai sha n ga, Mawdaw lam kaba n kau hpe mung pat di da ai lam chye lu ai.
Mani hpawt June 25 ya jahpawt jau kaw na, lahta Sam Mung Nawng Cho, Kyauk Me, Ti Paw, hte Mogok ginwang kata na Myen hpyen dap ni hpe Balawng TNLA hte PDF pawng hpawm dap ni htim gasat hpang wa ai rai nga ai re.
Myen hpyen dap hte Jinghku Rawt Malan Pawng Hpawm dap masum lapran Miwa Asuya lapran salang tai nna, Haigin myit hkrum ga sadi ta masat htu da ai rai tim, Miwa Dat kasa De Shi Jion Myen mung de June 18 ya shani sa du ai hpang kaw na, kalang bai gap gasat hkat wa ai lam rai nga ai.
