Myen Hpyen Byuha Kawng Na Gap Shadam Ai Laknak Kaba Si A Majaw Mung Shawa 1 Si Nna Marai 4 Hkala Hkrum Wa
Hpakant Myen hpyen byuha dap kaw na gap dat ai laknak kaba si, Seng Tawng hta wa hkrat kapaw ai majaw, mung shawa marai 4 hkala hkrum wa nna, langai dai shara hta nan asak si hkrum wa ai nga, Hpakant ginra masha ni kaw na chye lu ai.
June 26 ya jahpawt hkying 9 daram ten Hpakant Myen hpyen Byuha dap na gap shadam dat ai laknak kaba si Seng Tawng Mare Tseing Mya Tu Kha ( စိန်မြသုခ) hpungkyi jawng wang makau hta wa hkrat kapaw ang ai majaw, makau na hpalap seng hte ja seng hta nga taw ai mung shawa marai 3 hkala hkrum wa nna, ngam ai langai gaw dai shara hta nan si hkrum wa ai nga, dai ginra na amyu shayi langai KNG shiga dap de tsun dan wa ai re.
“Laknak kaba Tseing Mya Tu Kha ( စိန်မြသုခ) hpungkyi jawng wang kaw nan wa hkrat kapaw ai, dai kaw kapaw ai majaw, makau na Hpalap seng kaw saboi htu galaw taw nga ai la shabrang langai lata maga daw mat nna, dai seng kaw hpalap dung lu nga ai salang langai asak si hkrum wa ai, ngut na Ja seng na ပန်တိမ် sara wa mung hkala hkrum ai, ngut na langai gaw Sam Kawng de na re, 3,4 lang wa hkrat kapaw ai,” nga tsun dan ai re.
Dai zawn sha Hpakant Myen hpyen dap na gap dat ai laknak kaba si, Sam Kawng lawk na nta langai hta wa hkrat kapaw ai majaw, Kayin la kasha langai mung hkala sawng wa nna, lam ni pat da ai majaw, tsi tsi hkam la na matu yak hkak taw nga ai re lam chye lu ai.
Hpakant byuha kawng na gap dat ai laknak kaba si Seng Tawng mare makau grup yin hta 3,4 shara hta wa hkrat kapaw ai majaw, mung shawa marai 3 hkala nna, langai gaw dai shara hta nan asak si hkrum wa ai rai nga ai.
Myen hpyen dap maga na laknak kaba ni hte ding yang matut gap shadam bun taw nga ai majaw, laga shara ni hta gade ram gara hku hkala ai ngu hpe a tsawm tup hkrak chye lu na matu matut yak hkak taw nga ai re.
Mana maga de mung Lung Hkang mare lung seng dut mari ai shara makau hta laknak kaba wa hkrat ai majaw, mung shawa dum nta wan hkru hten wa ai re.
Myen hpyen dap kaw na ndai laman hpyen shamu shamawt hkawm wa ai majaw, KIA hte PDF dap ni kaw na lam lapran hkap shingla gasat dat ai lam ni a majaw, Myen hpyen dap maga na laknak kaba gap shadam bun taw ai nhtoi lahkawng ya rai sai lam chye lu ai.
Myen hpyen dap shamu shamawt hkawm wa shagu KIA dap maga na mung Drone ni hte hkan gap gasat ai lam ni galaw nga ai re.
Ndai laman Hpakant hta Myen hpyen dap hte KIA dap lapran hpyen masa shaja hkat ai lam ni ding yang byin taw nga nna, ang katut gap gasat hkat ai lam ni mung jahkring hkring byin nga ai re.
