Waimaw Hkat Cho sinpraw, Chyang Hkang Pa langu sun de shamu shamawt sa wa ai Myen hpyen hpung hpe KIA dap hkap shingla gasat ai hta, Myen hpyen dap maga sum machyi lam law wa ai re hpe chye lu ai.
June 27 ya jahpawt hkying 8 chyen daram hta Chyang Hkang Pa langu sun shara hta gap gasat hkat wa ai rai nna, dai de hpyen n-gun garum bai sa wa ai ni hpe mung bai hkap shingla gasat ai hta si hkala sum machyi lam law wa ai nga shawng lam magam gun ni tsun ai re.
“Mani hpawt anhte bu ni hkap anut jaw dat ai hta tsawm ra masan sa ai ga rai nga ai, gade daram si hkala ai chyawm n chye ai, Majan nbyin ai na wa ai re nga yang gaw, htu kanaw hkawm wa ai ga rai nga ai, dai hpe anhte maga na hkap nut dat ai kaw tsawm ra masan sa ai nga na ai,” nga tsun ai.
Waimaw ginwang kata KIA hte PDF pawng hpawm dap ni htim gasat shang wa ai kaw na, dai ginra mayan hta KIA hte PDF pawng hpawm dap ni shang shara la da ai hpe, Myen hpyen dap ni kaw na htu shadut sa wa ai majaw, majan gap gasat hkat wa ai re nga tsun ai.
Ya ten dai ginra hta majan kaba byin ai lam n nga ai rai tim, Myen hpyen dap maga na laknak kaba gap shadam bun ai lam ni ding yang galaw taw nga nna, Mung shawa hkra hkala machyi ai lam ni mung nga taw ai re.
Majan gap gasat hkat ai lam n nga tim, Myen hpyen dap maga na nbungli hte sa du pyen gayin ai lam, mahkrai ni hpe sa gap jahten ai lam ni galaw wa ai re.
