Waimaw hte Hkat Cho mare makau grup yin hta ndai laman laknak kaba si wa hkrat ai majaw, mung shawa marai 12 asak si sum sai rai nna, marai 30 hkawt hkala hkrum wa sai re.
Waimaw majan May 18 ya shani kaw na KIA hte pawng hpawm dap maga, Waimaw ginra de htu shadut htim gasat wa ai hpang, Myitkyina maga de na Myen hpyen dap laknak kaba gap shadam bun ai majaw, mung shawa si hkala hkrum wa ai rai nga ai.
Ya na zawn mung shawa si hkala hkrum ai laknak kaba si gaw, Myitkyina de na gap shadam ai laknak kaba si ni re nga mung mare masha ni tsun ai re.
Ya si hkrum ai law dik Hkat Cho mare kata na rai nna, nkau Lamyang hte Waimaw hkan na mung lawm ai re lam chye lu ai.
May 20 ya shani Hkat Cho Mare dum nta langai wa hkrat ang ai hta, marai 7 asak si sum ai law dik rai nna, May 21 ya shana de gap ai laknak kaba si hte marai 2 bai si hkrum wa ai re.
Dai hpang Lamyang mare na amyu shayi langai mung laknak kaba si hte asak si hkrum wa nna, Waimaw mare kata ndai laman wa hkrat bun ai laknak kaba si ni hte si hkrum wa ai rai nga ai.
Ya ten Waimaw ginra kata majan laman mung shawa si ai marai 12 hte hkala hkrum ai yawng marai 30 hkawt daram du sai lam chye lu ai re.
