Kutkai mare hta hpaw sharin taw nga ai Chtistian Education Centre (CEC) jawng hta, dai ning 2024-25 jawng lung ladaw hta jawng ma nau law mat ai majaw, sharin shara yak hkak taw nga ai lam chye lu ai.
Myen hpyen dap daru magam zing kau ai hpang, dai ginra hta nga ai mare kanu kawa myit su ni hte htung hking hpung kaw na ni woi awn ai hte Chtistian Education Centre (CEC) ngu ai prang wang hpaji jawng hpe hpaw sa wa ai re.
Dai prang wan hpaji jawng hpe Kutkai hpyen yen dabang hta mai byin ai hku hpaw sharin taw nga ai gaw, dai ning 1027 majan masing ngut ai hpang, Kutkai mare hpe Balawng dap ni up madu kau ai hpang, dai jawng hta shawoi shaning na hta jawng ma grau law jat wa ai majaw, sharin shara yak hkak taw nga ai re nga dai ginra na lit nga ai ni KNG shiga dap de tsun ai re.
“Ya hkyak hkyak jawng gawk ra ahkyak taw nga ai, matsut matsat hte mai byin ai hku hpaw sharin taw nga ai, ya jawng ma nkau mung rai n du wa shi ai, gara kaw kaning rai sharin ai baw re kun ngu jahkrup bawng ban na shara tam taw nga ai,” nga tsun ai re.
Ya na zawn jawng ma law jat wa ai majaw, mi sharin taw nga ai hpyen yen dabang wang hta shara kaji mat ai sha n ga, dung lahkum hte laga jawng lang arung arai ni mung matut ra gadawn nga ai lam tsun ai re.
Chtistian Education Centre (CEC) jawng hta amyu baw sang hkum, nawku makam masham n gin hka, Myen, Sam, Balawng, Miwa, Gawrahka yawng sa du sharin hkam la taw nga ai hpaji jawng re lam chye lu ai.
Balawng TNLA dap maga Kutkai mare hpe zing madu up hkang taw nga nna, lai wa sai ten Myen asuya kaw na hpaw sharin ai jawng ni hpe Balawng TNLA a hpaji masing hte hpaw sharin ai rai tim, sa lung ai jawng ma ni grai yawm mat ai nga tsun ai re.
Ya ten Kutkai ginra hta Chtistian Education Centre (CEC) jawng shara a matu Balawng TNLA uphkang rung de hpyi shawn da ai rai tim, TNLA dap maga de na ya ten du hkra ahkang jaw ai lam rai n nga shi ai lam chye lu ai.
Chtistian Education Centre (CEC) jawng hpe KG kaw na tsang 9 du hkra Kutkai hpyen yen dabang camp (1) hta hpaw sharin taw nga nna, lahta tsang 10 kaw na 12 du hkra hpe chyum jawng wang hta hpaw sharin sa mat na re lam chye lu ai.
Ya ten Mungmyit Sinli ginra hta hpaji jawng hpaw sharin na lam ni hte seng nna, Balawng TNLA dap ni hte tsun jahkrup bawng ban la yak taw nga ai nga, ginra mash ani tsun ai re.
