Balawng TNLA dap ni rim woi mat ai Bangshau mare salang hpe lawan bai dat ya na matu ginra masha ni hpyi shawn taw nga ai re.
Lashio sinpraw Mai Yaw mare makau, Bangshau mare uphkang salang Slg Shalaw Lum Dai hpe TNLA dap maga June 9 ya shana hkying 9 daram hta shi n ta kaw na sa rim woi mat nna, dai ni nhtoi 5 ya na wa ai ten du hkra rai ndat ya shi ai lam chye lu ai.
Salang Shilaw Lum Dai hpe TNLA dap ni Mungjat mare de rim woi mat nna, ya ten du hkra hpa majaw rim woi mat ai ngu hpe n chye lu ai nga, dai mare na lit nga ai ni KNG shiga dap de tsun ai re.
“Ya hpang jahtum chye ai daram nga yang anhte mare salang Shalaw Lum Dai hpe sa hkrum shaga na matu sa yang Balawng TNLA dap ni jahkrum shangun ai, shan hte shagyit kaw na bai n htang kau shangun ai, ya na zawn anhte mare salang hpe hpa mara nga na rim woi ai ngu hpe anhte mare masha ni chye mayu ai, ya gaw gadai hpe n jahkrum shangun ai Mungjet mare hta rim woi da ai ram sha chye lu ai,” nga tsun ai re.
Lai wa sai June praw 9 ya shana Bangshau mare hta jawng hpaw na lam hte seng nna, mare salang nta zuphpawng hpawng taw nga ai ten, Balawng TNLA dap ni kaw na dum nta hta shang gasawk nna, nta madu salang wa hpe rim woi mat ai rai nga ai.
Dai rim woi ai hta dai kaw nga taw ai Salang marai 4 hte hpawn rim woi mat nna, Mungjet Balawng dap du ai hpang laga salang ni hpe bai dat dat ya nna, mare salang wa hpe sha matut rim woi da ai re.
Ya na zawn mara kata rim woi mat ai Salang Shalaw Lum Dai hpe lawan dat ya na matu ginra masha ni hpyi shawn nga ai re.
KIO Uphkang ginra Dapba 10 Dung 17 ginra Bangshau mare gaw nta hting gaw 200 jan nga ai jinghpaw mare rai nna, KIO/KIA hpe hpaw hpang wa ai mare kaji langai mung rai nga ai.
Dai mare hta lai wa sai ten Myen asuya lapran tsang jawng nga ai mare rai nna, Myen hpyen dap daru magam zing kau ai hpang, jawng sara saranum ni yawng CDM shang ma ai majaw, dai hpaji jawng pat kau ra ai hpang, ginra masha ni kaw na mai byin ai hku prang wan jawng hpe hpaw sharin taw nga ai re.
Ya na zawn prang wan jawng hku hpaw sharin nga ai hpe, dai ning 2024-25 ning jawng lung shaning hta KIO asuya a garum ningtum hte hpaw sharin na matu hkyen taw nga ai re.
