Nmawk Mare De Hpyen N-gun Htu Shadut Wa Ai Myen Hpyen Hpung Hte Majan Laja
Manmaw kaw na Nmawk mare de hpri gang mawdaw hte hpyen n-gun htu shadut shang wa ai Myen hpyen hpung ni hpe KIA dap maga hkap shingla gasat ai kaw na majan laja lana htim gasat hkat taw nga ai lam chye lu ai.
Nmawk majan hta Myen hpyen dap maga sum machyi lam ni law wa ai majaw, Manmaw maga de na hpri gang mawdaw ni hte Nmawk maga lai lung wa ai Myen hpyen hpung ni hpe KIA dap maga hkap shingla gasat ai hta, Majan laja lana gap gasat hkat taw nga ai lam shawng lam hpyen shi sawk ni tsun ai re.
“Myen hpyen ni tsawm ra sum machyi wa sam ma ai, ya Manmaw de na hpyen n gun jat na matu Tank mawdaw hte lung wa ma ai, ya dai hpung ni hpe hkap gap gasat ai majaw, majan laja taw ai ga rai nga ai,” nga tsun ai.
Ya ten Nmawk mare hta Myen hpyen dap maga sum machyi lam ni law nga ai majaw, mung shawa dum nta maga ni de laknak kaba hkrup mara gap shadam bun nga ai zawn, Nmawk Hk.M.Y (437) de hpyen n-gun bai jat bang wa ai rai nga ai.
Nmawk Myen hpyen dap Hk.M.Y (437) dap kata hta Jummar jak kaba shadun da ai majaw, Drone ni tsep kawp n mai lang taw ai majaw, ya laga ladat hte bai htim gasat na hkyen taw nga ai lam tsun ai re.
Manje mare na Myen hpyen dap shara 2 hpe mung KIA dap maga laja lana htim gasat taw nga ai majaw, Mandalay Tada Oo maga de Jet Nbungli hte shani shana wa gap bun taw nga ai lam chye lu ai.
May 28 ya shana hkying 8 daram aten hta mung, Myen hpyen dap maga nbungli hte shana tup bawm wa jahkrat bun ai majaw, dai ginra na mung shawa dum nta nkau hkra hten hkrum wa ai re.
Dai ni mung Manje mare hta laja lana matut gap gasat hkat taw nga nna, Myen hpyen dap maga laknak kaba, nbungli ni hte ding yang gap shadam bun nga ai re.
