KIA Dap Awn Daju Magam Lit Hpe Lat Du Daju Jum Dukaba Wang Hkang Awng Seng La Hpe Shatsam

Wunpawng Mungdan Shanglawt Hpyen Dap, KIA Dap Awn Daju Dukaba Qukhkyawng Hkawng Lum n nga mat wa ai hpang, Dap-Awn Daju magam lit hpe Lat Du Daju Jum Dukaba Wanghkang Awng Seng La hpe bai shatsam dat ai lam chye lu ai.

Dukaba Qukhkyawng Hkawng Lum gaw, May 13 ya shani machyi makaw hte n nga mat wa ai hpang, May 18 ya shani Wunpawng Mungdan Shawnglawt Kongsi Aming hte Dukaba Wang Hkang Awng Seng La hpe Du Daju tsang kaw na Lat Du Daju Jum tsang sharawt dat nna Dap Awn Daju (CS) aya dang san hkrum wa ai rai nna, Ningtau Dap Up (VCS) hpe Du Daju Maran Zawn Tawng hpe tang san dat ai lam chye lu ai.

Lat Du Daju Jum Dukaba Awng Seng La gaw hpaji chye, magrau grang ai Dakasu jawng ma langai rai nna, 1985 ning Nambyu Namhkam mare hta Jawng sara galaw nga ding yang KIA magam dap de shang wa ai re lam chye lu ai.

1990 ning hta Lat Du Tsang hte Ningbaw Kaba Lanyaw Zawng Hra a dinghkrai karum du lit hpe gun hpai wa sai re.

Dai hpang 2004 ning kaw na 2009 ning du hkra hpyen kaichyan rung matsun dukaba lit hpe woi awn awn wa nna, 2009 ning Myen mung ra lata poi hta ra lata poi shang na Jinghpaw party ni hpe mung masa lam maga mi hku na garum madi shadaw wa sai re.

Dai hpang 2015 ning kaw KIA Ningtau Dap Awn Daju Tsang 2 hpe lit la gun hpai wa ai kaw na 2023 ning January shata kaw na Ningtau Dap Awn Daju Tsang 1 kaw na, ya 2024 May 18 ya shani hta Dap-Awn Daju magam lit de shatsam hkrum wa ai re.

Lat Du Daju Jum Dukaba Wanghkang Awng Seng La gaw, Hugawng Danai ginra hta Jawng Sara, Karate Sara galaw wa ai rai nna, Dakkasu jawngma prat hta laika law law hpe ka lai wa ai laika ka sara kaba langai mung re lam chye lu ai.

Shi gaw Chyurum shalat Magazine hte Hparat Ninghkawng Magazine ni hta Sumrai, Sumroi ka ai hta, Plastic La Awng ngu ai ningka mying hte ka lawm wa sai re.

Ndai hpang daw hta mung Wang Hkang Awng ngu ai mying hte Jinghpaw ginru ginsa labau ni hpe Myen laika hku na ka shapraw taw nga ai re.

“Dukaba Awng Seng La gaw, Hugawng ga na rai nga ai, Myu tsaw myit grai kaba ai wa re, gadai hpe mung lachyen lahka n garan ai sha chye ganawn mazum ai, shi jawng sara galaw ai, karate sara galaw ai, jinghpaw hte seng ai laika law law hpe Plastic La Awng ngu ningka mying hte ka ai wa re, shi a hpyen magam lit hte seng na chyawm ngai dai ram n chye ai, rai tim shi gaw myu tsaw myit grai hpring ai hpaji chye ai ningbaw kaja langai re.” nga nna shi hte hku hkau ai salang langai KNG de tsun ai re.

Asak 68 ning Dukaba Awng Seng La gaw shi hta jit dwi sai rawt ana lu ai rai nna, hkamja lam hpe grai hkan nang hkan shatup chye ai wa re.

Ningtau Dap Awn Daju (VCS) maga lit shatsam hkrum ai Du Daju Maran Zau Tawng mung hpaji chye ai Dakkasu jawng ma prat hta KIA magam dap de shang wa ai wa rai nga ai.

Dukaba Maran Zau Tawng gaw myutsaw mung tsaw myit hpring ai, hpaji chye ai asak ram ai ningbaw kaja langai re lam shi hte ni nawn ai ni tsun ai re.

“Dukaba gaw asak ram ai ten KIA magam dap hta Reng Tsang lung lawan dik Dukaba ngu mu ai, shi gaw Zai Ninggawn hta nga ai ten hta rai tim mung masa lam hta grai kung kyang ai ngu mu ai, myutsaw mung tsaw myit hpring ai wa re” nga shi hte hkau chyap ai magam gun ni tsun ai re.

Ya ten Wunpawng Mungdan Shanglawt Hpyendap, KIA Dap Up Daju magam lit hpe Dukaba Nban La lit la da nna, Dap Awn Daju (CS) hpe Lat Du Daju Jum Dukaba Wanghkang Awng Seng La, Ningtau Dap Awn Daju (VCS) hpe Du Daju Maran Zau Tawng ni lit la taw ai re lam chye lu ai.