Sumprabum Majan hta Hk.L.Y (137) Dap Dung Yawng Hkrat Sum

Sumprabum Majan kaw na hprawng pru wa ai Myen Hpyen dap Hk.L.Y (137) dap up hte hpawn hpyen la marai 9 hpe Putao KPDF ni kaw na lu rim la ai lam, lit nga ai ni kaw na chye lu ai.

Dai Myen hpyen hpung ni hte May 18 ya shani aten gadun laman gap gasat hkat ngut ai hpang, Putao KPDF dap ni hkap lu rim wa ai re.

Dai lu rim ai dap up wa gaw, shi hta hkra hkala ai ningma ni hte sai htaw lai nna, lu rim da ai hpang shani jang asak si sum mat ai nga, shawng lam magam gun hte ni nawn ai salang langai  KNG shiga dap de tsun dan wa ai re.

“Sumprabum dap kaw dung ai Hk.L.Y (137) dap dung up hpe Putao shawng lam shara mi kaw majan gap gasat ai lam byin ngut ai hpang jahkrung lu rim ai, lu rim ai ten shi hta ningma tsawm ra sawng ai, lagaw mung daw ai, dai hpe anhte mag ana ni tsi a tsawm sha hkap tsi ya ai rai tim, ningma sawng ai majaw hpang shani jang si mat ai,” nga tsun ai.

Sumprabum majan kaw na hprawng pru wa ai Myen hpyen hpung ni hpe, marai 5 kalang, marai 3 kalang, marai 1 kalang hkap lu rim ai lam matut tsun dan ai re.

Ya hkap lu rim da ai Myen hpyen hpung ni hpe mungkan hpyen tara Geneva Convention hte maren a tsawm sha tsi hkap tsi gawn lajang da ya nna, shim ai shara ni hta tawn da ai lam chye lu ai.

Ya matut nna, rai tim Hk.L.Y 46 dap na dap up Dukaba hte rau nkau nam maling hta naw mat taw nga ai rai nna, si ai kun? hkrung ai kun ngu hpe atsawm n chye lu shi ai majaw, yawng sadi maja na naw nga taw ai re.

Shata lahkawng hkawt na ai Sumprabum majan hta sa shang gasat lawm ai Machyang baw mare daju Hk.L.Y (137) na dap dung nawng dai majan hta yawng hkrat sum mat ai masa re lam, shawng lam magam gun ni tsun maram da ai re.

Sumprabum Myen hpyen dap hpe htim gasat zing madu kau ngut ai hpang, Sumpyi Yang mare makau grup yin hta hpyen masa shaja hkat taw nga ai rai nna, dai shara hta Myen hpyen dap maga na hpyen n’gun ni wa du jahkrat da ai majaw, ndai laman majan byin wa na masa nga ai nga, ndai zawn matut tsun maram da ai re.

“Sumpyi Yang mare hta Myen hpyen n’gun wa jahkrat da ai majaw, majan gaw byin wa na masa nga ai, ya anhte Sumprabum ginwang hta chyawm gaw yawng jasan kau lu sai, ya matut na Putao Sumpyi Yang hte Lungsha Yang maga de gaw majan bai byin wa na masa nga ai,” nga matut tsun dan wai re.

Myen hpyen dap hpyen n’gun kaba hte Sumpyi Yang mare de du shang wa ai majaw, dai mare na mung shawa yawng nam de hprawng yen taw nga ai shata mi hkawt du wa sai majaw, malu masha hte laga garum ningtum lam ni matut ra ahkyak taw nga ai lam tsun ai re.

Sumprabum Myen hpyen dap hpe lai wa sai March 14 ya shani kaw na htim gasat hpang wa ai gaw, shata lahkawng hkawt na ai hpang, May praw 5 ya jahpawt htim gasat zing madu kau lu wa sai re.