Myitkyina Myen Hpyen Nbungli Pa hpe KIA PDF dap maga laknak kaba hte sa gap bun wa ai nga, shawng lam hpyen shi sawk ni kaw na chye lu ai.
May 18 ya jahpawt hkying 8 daram aten hta Myitkyina Myen Hpyen Nbungli Pa hpe PDF dap maga 107 mm Short Taik laknak kaba hte sa gap bun ai hta, Myen hpyen nbungli pa hkra hten ai lam nga ai nga, shawng lam magam gun ni kaw na chye lu ai re.
“Masan sa ai, hkra hten ai lam nga wa ai gade daram gara hku hkra hten ai ngu chyawm a tsawm n chye ai,” nga tsun dan ai re.
Myen hpyen nbungli pa sa gap hkrum ai hpang, Myen hpyen dap maga na mung laknak kaba ni bai gap shadam bun wa ai majaw, mung mare masha si hkala ai lam hte dum nta hkra hten ai lam ni nga wa ai nga, mung shawa langai tsun ai re.
“Myen hpyen dap kaw na gap dat ai laknak kaba anhte Pang mati mare hta wa hkrat ai majaw, dum nta lahkawng hkra hten ai, marai 2 dai kaw nan si nna, marai 3 hkala hkrum wa ai, ya tsi rung de yawng htaw sa da sai,” nga tsun ai re.
Myen hpyen dap kaw na dai zawn laknak kaba gap shadam bun wa ai majaw, Pang Mati, Maw Hpawng, Shadau mare ni hta wa hkrat kapaw ai lam nga ai hpe chye lu ai.
Ya na zawn Myen hpyen dap maga laknak kaba hkrup mara gap shadam bun taw nga ai majaw, mung mare masha ni kaw nna, sadi maja let hkawm sa na lam, lit nga ai ni kaw na tsun da ai re.
Ya ten Waimaw hte Manmaw mare kaba makau grup yin hta Myen hpyen dap hte KIA dap lapran majan laja lana htim gasat gap hkat taw nga nna, Myen hpyen dap maga na mung nbungli laknak kaba hte ding yang gap shadam bun taw nga ai re.