Waimaw Ginwang Kata Na Myen Hpyen Dap hpe Htim Shagrawt ai Hta Katsu hte Shwenyaung Pin dap Shara sha ngam sai lam shawng lam magam gun ni tsun
Wunpawng Mungdan Shanglawt Hpyen dap KIA hte pawng hpawm dap ni kaw, Waimaw hte Namsan Yang lapran naw ngam nga ai Myen hpyen dap shara hte bum de naw ngam ai dap shara 10 jan hpe dai hpawt manap htim gasat hpang wa ai gaw, shara law malawng hpe padang dip zing madu da lu sai nga, shawng lam hpyen shi sawk ni kaw na chye lu ai re.
Dai hpawt manap May 18 ya jahpawt jau hkying 4 daram kaw na, Waimaw Namsan lapran na, Katsu, Shwe Nyaung Pin Hk.M.Y (321), Aungmye (1), Aungmye (2), Hka Shi, Byipu Kawng, Laihpawng, Wuhtau Bum, Dingga, Sam Pai, dap shara ni hpe kalang dat htim gasat wa ai rai nga ai.
Dai dap shara ni hpe htim gasat ai hta, dai na maga de hkying 3 daram ten du hkra rai yang, Waimaw Shwe Nyaung Pin dap hte Katsu Myen hpyen dap shara sha ngam sai rai nna, laga ngam ai dap shara ni hpe, zing madu kau lu sai nga shawng lam hpyen magam gun ni KNG shiga dap de ndai zawn tsun dan wa ai re.
“Dai ni zing kau lu ai gaw, Wuhtau Bum byuha dap kaba, Aungmye (1) Aung Myen (2) yawng hpe zing madu da lu sai, ya naw ngam ai gaw Shwenyaung (321) hte Katsu dap sha ngam sai, majan gaw ya naw matut byin nga ding yang re,” nga tsun ai.
Dai dap shara ni hpe htim gasat ai hta, Myen hpyen dap maga, nbungli hte shani ting sa gap bun nna, Myitkyina kaw na laknak kaba ni hte mung gap bun wa ai re lam chye lu ai.
Gasat gala majan byin ai hta, lahkawng maga dap na si hkala ai lam nga ai rai tim, gade daram nga ai ngu a tsawm tup hkrak n chye lu ai re.
Ya ten Waimaw mare kaba makau na Hka Shi mare du hkra KIA hte PDF dap maga shara la da lu sai lam, chye lu ai.
Waimaw Aungmye (1) mare hta dap jung shara jahkrat nga ai Myen hpyen dap hte Pyithutsit dap shara ni hpe dai ni asan sha gawt shatsai kau lu sai nga, dai ginra na mung shawa ni tsun ai re.
Dai ginra ni hpe lai wa sai March shata hta KIA dap maga kalang htim gasat zing madu kau lu sai shara ni rai nna, mung shawa ni pat hkrum taw ai lam ni a majaw, KIA dap maga bai gan hting nut kau ya ai rai nga ai.
Miwa jarit, Dabak hka a dingdung maga na Byinpu kawng, Sampai, Laihpawng, Dingga Myen hpyen dap shara ni yawng hpe mung, dai na maga hkying 2 daram hta yawng zep zi zing madu kau ngut sai lam chye lu ai.
Ya ten Katsu mare makau grup yin hta laja lana matut gap gasat hkat taw nga nna, dai dap shara hpe gaw zing madu la lu ai lam rai n nga shi lam matut tsun dan ai re.
Wunpawng Mungdan Shanglawt Hpyendap KIA hte pawng hpawm dap maga lai wa sai March 7 ya shani Myitkyina Manmaw lam n tsa na dap shara law law hpe htim gasat zing madu kau ngut ai hpang, ya matut naw ngam ai dap shara ni hpe dai ni numdaw kalang bai htim gasat wa ai mung rai nga ai.
