Myitkyina Myen Hpyen Dap Kaw Na Waimaw Maga De Laknak Kaba Ni Hte Gap Sharu bun
Mung Shawa Hkrit Kajawng Nga
Myitkyina Namkoo (37) Myen hpyen dap hte Mawhpawng amyawk dap kaw na, Waimaw maga de laknak kaba laja lana gap bun taw nga ai lam ginra masha ni tsun ai re.
Dai na maga hkying 6 daram kaw na, Myitkyina kaw na Waimaw maga de laknak kaba ni ding yang gap bun nga ai majaw, makau grup yin nga ai mung shawa ni hkrit kajawng ai lam ni byin nga ai nga, Waimaw ginra masha langai KNG de tsun ai re.
KIA hte pawng hpawm dap maga mani May 18 ya jahpawt kaw na, Waimaw hte Dabak lapran na Myen hpyen dap 10 jan hpe htim gasat taw nga ai gaw, ya ten majan laja lana matut gap gasat hkat taw nga ai re.
Dai hpawt manap jau hkying 6 daram aten kaw na, Shwenyaung Pin hte Katsu Myen hpyen dap shara ni hpe sa htim gap gasat ai hta, Myen hpyen dap maga na nbungli hpan hkum hte shani ting sa gap bun taw nga ai rai nna, lahkawng maga majan matut laja taw nga ai re.
Dai ni htim gasat ai hta, Shwenyaung Pin hte Gara Yang mare lapran Lungzep kawng kadawng na Myen hpyen dap shara hpe htim gasat zing madu kau lu ai lam chye lu ai.
Myen hpyen dap maga na dai ni tup Waimaw hte Shwenyaung Pin mare makau grup yin hta Y-8, Y-12, Jet Fighter, Holicopter nbungli hpan hkum hte sa gap sharu bun taw nga nna, amyawk mawtar laknak kaba si ni hte ding yang gap shadam bun taw nga ai re.
