Putao de nbungli hte wa htaw sa da ai Myen hpyen n’gun 100 jan gaw, Sumpyi Yang mare de du shang wa ai majaw, dai mare na mung shawa hkying lam nam de dum bri dum bra hprawng yen taw nga ai lam ginra masha ni kaw na chye lu ai.
Dai Myen hpyen hpung ni Tang Ja mare kaw na Sumpyi Yang mare de yu wa ai ten, Wa Dat mare na mung shawa nkau hpe Hpyen ninggang shatai rim woi let, yu wa ai re lam chye lu ai.
Myen hpyen dap ni kaw na mung shawa ni hpe hpyen ninggang shatai nna, Sumpyi Yang mare de du wa ai majaw, dai mare kata majan byin wa na myit tsang ai hte, Myen hpyen dap a lata de du na hpe myit tsang ai mung mare masha ni yawg nam maling de hprawng yen taw nga ai lam ginra masha langai KNG shiga dap de tsun dan wa ai re.
“ Madung gaw Portar rim woi hkrum na tsang ai hte, Majan byin wa na masa pru wa ai majaw hprawng yen taw ai ga rai nga ai, ya Myen hpyen hpung ni yu wa jang gaw majan byin na sha rai nga ai, dai majaw mare masha yawng hprawng yen sai,” nga tsun dan ai re.
Ya ten Sumpyi Yang mare masha ni gaw, Wadat mare masha ni zawn hpyen ning gang shatai woi hkawm na hpe myit tsang ai majaw, nam maling de hprawng yen taw nga ai rai nga ai.
Sumpyi Yang mare hta du nga ai Myen hpyen hpung ni gaw, mare masha ni a, dum n’ta adup hpaw nna, malu masha hte manu dan ai arung arai ni hpe lagu mya la nna, U, Wa ni mung gap sat sha taw nga ai lam tsun ai.
May 10 ya shani Tang Ja kaw na Sumpyi Yang de yu wa ai Myen hpyen hpung ni hpe N Dawng Bum hte Hkau Bum lapran KIA dap maga hkap shing la gasat ai lam nga ai hpe chye lu ai.
Dai hkap shingla gasat ai hta, Myen hpyen dap maga si hkala ai lam nga ai majaw, Wadat mare na mung shawa ni hpe Sumpyiyang mare du hkra Hpyen ninggang shatai woi hkawm wa ai re.
Sumpyi Yang mare masha ni hprawng yen taw nga ai nhtoi 3 ya na wa sai hte rau, aten galu na wa ai rai yang, malu masha yak hkak wa na hpe myit tsang ai lam Sumpyi yang ginra masha ni tsun ai re.
Hpyen ning gang shatai woi hkawm ai Wa Dat mare na mung shawa ni hpe May 11 ya shana Sumpyi yang du ai hpang bai dat dat ya sai lam chye lu ai.
Sumpyi Yang mare de Myen hpyen dap hpyen n’gun kaba hte htu shadut shang wa ai majaw, KIA dap maga Drone hte laknak kaba sa jahkrat bun ai lam ni nga wa ai re.
Ya ten Sumpyi Yang mare hta Myen hpyen dap hte KIA dap lapran Hpyen masa shaja hkat taw nga nna, dai Myen hpyen hpung ni gaw, Sumprabum maga de man yawng taw nga ai re lam ginra masha ni tsun maram da ai re.