Nmawk, Manje Majan Ni De Myen Hpyen Dap NBungli Hte Laja Lana Wa Gap Bun Nga

Nmawk hte Manje mare ni de Majan laja lana gap gasat hkat taw nga nna, dai hpawt manap hkying 9 daram hta Manje Mare shinggan na Wa Lawng Laq Myen hpyen dap hpe htim gasat zing madu wa lu sai lam chye lu ai.

Dai hpawt htim gasat zing madu la lu ai, Wa Lawng Laq Myen hpyen dap hpe lai wa sai May 6 ya shani kaw na htim gasat ai gaw, dai hpawt manap zing madu la lu sai lam shawng lam hpyen magam gun hte ni nawn ai magam gun langai KNG shiga dap de ndai zawn tsun dan wa ai re.

“Manje mare shinggan na Wa Lawng Laq bum hpe htim gasat zing kau sai, ya zing kau lu ai dap shara gaw shan hte na ahkyak ai ကာကင်း dap hpe zing la ngut sai, myo kata na Myen hpyen dap Hk.M.Y (319) hte amyawk dap (601) hpe gaw hpa rai n sa hkra shi ai,” nga tsun dan ai re.

Majan sum machyi law taw nga ai Myen hpyen dap gaw, dai na maga de Myitkyina hte Mandalay de na lung wa ai nbungli 9 daram hte laja lana wa gap sharu bun taw nga ai lam shawng lam hpyen shi sawk ni matut tsun dan wai re.

Nmawk maga de mung, mare kata ni hta shara jahkrat nga taw ai Myen hpyen hpung yawng hpe gawt kau lu sai rai tim, Nmawk mare ka-ang na Hk.M.Y (437) Myen hpyen dap naw ngam ai re hpe chye lu ai.

Mare kata na Myen hpyen hpung ni hpe htim shagrawt ai hta, laja lana gap gasat hkat taw nga ding yang rai nna, Nmawk mare kata na Myen hpyen dap hpe mung laja lana htim gasat taw nga ai re.

Ya ten Nmawk mare kata mung shawa yawng gadai mung n nga mat sai rai nna, mare kata KIA dap maga up madu da lu sai zawn Myen hpyen dap hpe matut htim shagrawt taw nga ai re.

Manmaw mare kata de ni ni htep htep gap gasat hkat wa ai majaw, Manmaw mare masha yawng mung dai hpawt manap kaw na nam lam hku, hprawng yen taw nga ai lam hte seng nna, ginra masha langai KNG shiga dap de ndai zawn tsun dan wa ai re.

“Ndai kaw ngoi ai gaw ding yang ngoi taw nga ai, Manmaw kaw na laknak kaba ding yang gap garum taw nga ai le, Manmaw hte deng 4 daram sha tsan ai shara hta gap hkat taw nga ai, ya Manmaw mare ni gadai n nga sai, dai ni anhte yawng mung nam lam hku na hprawng yen taw nga sai,” nga tsun wa ai re.

Ya ten Manmaw, Nmawk Manje ginra na Myen hpyen dap shara ni hpe KIA woi awn ai pawng hpawm dap ni htim shagrawt taw nga ai rai nna, dai shara ni hpe htim shagrawt ai, nhtoi 4 ya laman hta Myen hpyen dap 10 daram hpe htim gasat zing madu da lu sai re.

Dai ginra na mung shawa mun lam gaw, mai byin ai hku tinang chye ai shara ni de hprawng yen hkawm taw nga ai re.