Myitkyina Manmaw lam kaba Dabak hka mahkrai hpe, Myen hpyen dap ni kaw na, May 8 ya shana hkying 7 daram hta bawm kapaw jahten wa ai lam chye lu ai.
Majan sum taw nga ai Myen hpyen dap gaw, n dai laman Sama, Kagam, Gidon maga de na Myen hpyen dap shara ni yawng hpe htim gasat zing madu kau ma ai hpang, Katsu mare Dabak mahkrai pawt hta dap jung nga ai Myen hpyen dap ni kaw na kapaw jahten wa ai re nga, shawng lam hpyen shi sawk ni tsun wa ai re.
Dai mahkrai hpe kapaw jahten ai hta, mahkrai daw mat ai lam n re sha, mahkrai lam ntsa na Concrete bilat kapaw waw mat ai madang sha re lam mu lu ai re.
Ya kapaw jahten kau ai shara hta hpun pyen pa nep na naw mai lai ai nga, ginra masha ni tsun ai re.
Dai mahkrai hpe NLD asuya lakhtak hta Concrete mahkrai kaba hku na gaw gap da ai lahkawng ning daram sha naw rai yang, ya na zawn bai kapaw jahten wa ai mung rai nga ai.
Myen hpyen dap maga na ya na zawn Dabak hka mahkrai kaba hpe kapaw jahten wa ai lam gaw, Waimaw maga de hpyen n-gun garum n lu sa na matu kapaw jahten wa ai masa re nga ginra masha ni tsun maram nga ma ai re.
