Putao De Nbungli Hte Wa Htaw Sa Da Ai Myen Hpyen Hpung Ni Sumprabum Maga De Man Yawng Nga
Putao de nbungli hte wa htaw sa da ai Myen hpyen n’gun 100 jan gaw, ya ten Sumprabum maga de lai yu wa na masa nga ai majaw, hpyen masa shaja hkat taw nga ai lam ginra masha ni kaw na chye lu ai.
Sumprabum Myen hpyen dap hpe tat sum kau ai hpang, Putao mare kaba de mani May 8 ya shani nbungli hte hpyen n-gun wa htaw jahkrat da nna, dai hpyen hpung ni gaw, mana yup tung hkying 11 ten daram hta Sumpyi yang maga de lai yu wa ai nga, Putao ginra masha langai KNG shiga dap de tsun dan wa ai re.
“Mani nbungli hte wa htaw sa da ai, hpyen n-gun gaw latsa jan re mana yuptung hkying 11 ram hta Lungsha Yang de yu mat wa ai, ya Tangja mare kaw du nga ai, maram yu yang Sumprabum de yawng maw ai kun? Majan gaw bai laja wa na re dai ni hte,” nga tsun dan ai re.
Dai Myen hpyen hpung ni gaw, Putao kaw na, Lung Sha Yang de yu wa nna, ya ten Tang Ja mare hta wa du kaput taw nga ai lam chye lu ai.
Sumprabum maga de lai yu wa na masa nga ai Myen hpyen hpung ni gaw, ya ten Tangja mare hta wa du nga ai rai nna, KIA hte KPF pawng hpawm dap maga na mung lam lapran hkap shingla gasat na masa nga taw ai majaw, dai ginra de majan kaba bai byin wa na masa nga taw ai nga Lung Sha Yang mare masha ni tsun maram da ai re.
Ya ten Sumprabum hte Putao lapran Myen hpyen dap shara 5 daram naw nga ai rai nna, hkrun lam yawng hpe pat da ai re.
