Sinbo Mare hta Myen Hpyen Dap Nbungli hte Sa Gap Bun Nna, Majan Laja Lana Matut Byin Nga

Sinbo Myen hpyen dap hta, Wunpawng Mungdan Shanglawt Hpyendap KIA hte Myen hpyen dap ni lapran majan laja lana bai gap gasat taw nga sai re.

Dai hpawt April 26 ya jahpawt hkying 7 daram aten kaw na, lahkawng maga laknak kaba ni hte gap gasat hkat taw nga nna, Myen hpyen dap maga Jet Fighter Nbungli 2 hte Holicopter langai hte sa gap gasat taw nga ai nga, ginra masha langai KNG de ndai zawn tsun dan wa ai re.

“Dai hpawt hkying 7 kaw na lahkawng maga laknak kaba hte bai gap gasat hkat taw nga sai, nbungli hte mung sa gap taw nga ai, mana nbungli hte sa gap ai kaw, Mung shawa 1 si nna marai 2 hkala sawng wa ai, Nawku jawng wang ni mung hkra hten ai, ya ndai laman gaw majan bai laja wa na masa nga taw ai,” nga tsun ai re.

Myen hpyen dap maga April 25 ya shana hkying 4 daram hta mung, Jet Fighter nbungli 2 hte 3 lang da bat sa gap bun wa ai hta, Mung shawa marai 1 si nna, marai 2 hkala sawng wa ai re.

Dai shana Jet Fighter nbungli lahkawng hte mare makau grup yin 9 lang ram sa jahkrat bun kau da ai hta, mung shawa dum n’ta hte Nawku jawng wang ni hta wa hkrat ai majaw dum n’ta law law hkra hten wa ai nga matut tsun dan ai re.

Myen hpyen dap nbungli bawm a majaw, mung shawa dum nta law law hkra hten wa ai rai tim, mung shawa yawng tau hkrau kaw na hprawng yen taw nga sai majaw, grai wa hkra machyi ai lam n nga ai nga tsun ai.

Lai wa sai shata kaw na, Mali hka lam hpe bai hpaw dat ya ai majaw, mung shawa ni malu masha grai wa yak hkak ai lam n nga ai rai tim, majan aten ladaw galu wa ai hte rau lam shagu hta yak hkak ai lam ni law wa taw nga ai re.

Sinbo Myen hpyen dap hpe Wunpawng Mungdan Shanglawt Hpyendap KIA hte pawng hpawm dap maga lai wa sai February 10 ya shani kaw na sa htim gap gasat wa ai gaw, dai ni ten du hkra, num daw hte num daw gap gasat taw nga ai re.

Ya ten Sinbo mare na mung mare masha ni yawng gaw tinang man ang ai nam maling bum mare kahtawng ni de hprawng yen taw nga ai re.