Putao Ginra De Lusha Grai Yak Hkak Wa Ai Majaw, Gunrai Htaw Mawdaw Kaba Ni Hpe Aten Masat Na Jahkring Gan Hpaw Ya Na Hpe Mung Shawa Ni Hpyi Shawn Nga
Putao Ginra De Lusha Grai Yak Hkak Wa Ai Majaw, Gunrai Htaw Mawdaw Kaba Ni Hpe Aten Masat Na Jahkring Gan Hpaw Ya Na Hpe Mung Shawa Ni Hpyi Shawn Nga
Myitkyina Putao lam kaba pat da ai shata mi jan du wa nga sai majaw, dai ginra hta nga ai mung shawa nkau malu masha dum hprut wa nna, lam shagu hta yak hkak taw nga ai lam ginra masha ni tsun ai re.
Sumprabum Myen hpyen dap hpe htim gasat hpang wa ai March 9 ya shani kaw nna, dai ni ten du hkra Myitkyina Putao lam kaba pat da ai majaw, Putao ginra hta ya ten Datsi sau tau mi 20,000 Kyat nga ai rai tim dut jaw ai shara n nga mat sai lam Putao ginra masha ni tsun ai re.
Ya ten Putao mare hta Jak sau seng kaba ni pat mat ai bat 2 daram du sai rai nna, shinggan n’ta seng shawng hkan dut ai Dat si sau tau mi 18000 hte 20000 lapran jaw na mari lang ra taw nga ai nga tsun ai.
Putao ginra hta jak sau dum hprut mat ai sha n ga, laga malu masha hte arung arai ni mung dumhprut wa taw nga sai re.
Ya na zawn lam pat kau ai shata mi jan na wa ai aten, Sumprabum hte Putao mare lapran na mung shawa ni mung, bum yi simai ni hte sha mai byin ai hku asak matut taw nga ai lam tsun ai re.
Dai mare ni hta ya ten n-gun buri mi sen masum daram nga ai rai tim, dut jaw na masha gadai n nga ai lam matut tsun ai re.
Putao kaw na Mare kaba ni de htaw shalai na matu mari mahkawng da ai namsi namsaw ni yawng mung myin lai ma nna, lu da ai arang ni mung yawng sum ma sai nga ginra masha ni tsun ai re.
Ndai ten Putao ginra de malu masha mala la grai yak wa ai majaw, mung shawa ni hpe n shalai ai rai tim, gunrai htaw mawdaw kaba ni hpe aten ladaw langai masat ya nna, lai na ahkang jaw ya na hpe mung shawa ni myit mada ra sharawng taw nga ai re.
