Hugawng Lido lam, Danai hka lahta, na mare kahtawng 4 hta nbung laru sin marang hkrat ai majaw, dum n’ta tsa kaba hten mat ai lam ginra masha ni kaw na chye lu ai.
April 23 ya shana hkying 8 chyen daram hta Danai hka lahta, Lamung, Panep, Makaw hte Datsi mare kahtawng 4 hta nbung laru sin marang hkrat ai majaw, nta hting gaw tsa kaba na hpri tsut yawng waw hten mat ai majaw, gram lajang la na garum ningtum ra ahkyak taw nga ai nga, dai ginra na mung shawa langai KNG shiga dap de tsun dan wa ai re.
“Mana gaw laru hte Sin kaba hkrat ai majaw, dum n’ta ni yawng waw hten ma sai, nkau shadaw n ngang sai ni pyen ma, hpri tsut ni waw ma rai, nkau lu lawm ai ni gaw lu galaw la ai, yak hkak ai ni gaw rawng na dum nta n lu na yak hkak taw nga ai,” nga tsun ai re.
Danai mare hta gaw hpa n byin ai rai tim, Danai hte Deng 5 daram sha tsang ai mare kahtawng ni hta laja lana byin mat wa ai rai nna, ya hkyak hkyak dum n’ta gram lajang la na garum ningtum ra taw nga ai re.
Sin marang a majaw, hten mat ai dum n ta ni gaw, Makaw mare hta htinggaw 38, Lamung mare hta nta 400 jan, Panep mare hta 21, Datsi mare hta nta 500 jan hten ai kaw na, tsep kawp n mai rawng mat hkra waw hten mat ai gaw, 100 jan re nga ginra masha ni tsun ai re.
Ya ten lu lawm ai dum n’ta nkau gaw, tinang ding hkrai gram lajang la lu ai rai tim, yak hkak ai dum nta ni gaw, gram lajang la na yak hkak taw ai re.
Dai mare kahtawng 4 na mung shawa ni gaw, madung bum yi ni hpe galaw sha taw ai rai nna, lani tam lani sha rai yak hkak ai mare kahtawng ni re lam chye lu ai.
