Waimaw Myen Hpyen Dap Ni Kaw Na Makau Grup Yin Ni De Laknak Kaba Gap Shadam Bun Nga
Waimaw Myen hpyen dap Hk.L.Y (58) dap na laknak kaba gap shadam bun ai majaw, mung shawa dum n’ta hte n’ta rem U, Wa, Nga, Bainam, ni si hkrum taw nga nna, mung shawa dum n’ta ni mung hten hkrum taw nga ai nga ginra masha ni tsun ai re.
April 23 ya shana KIA dap maga Waimaw Myen hpyen dap hpe laknak kaba hte sa gap bun ai hpang, Myen hpyen dap maga na mung laknak kaba ni hte makau grup yin ni de gap shadam bun wa ai re.
Myen hpyen dap laknak kaba 10 lang daram gaw, Lamyang hte Mukchyik lapran wa hkrat nna, mare masha ni a Bainam rem dabang hte laga mung shawa dum nta ni hta wa hkrat ai majaw, Bainam hte dum n’ta nkau hkra hten wa ai nga, dai ginra na mung shawa langai KNG shiga dap de tsun dan wa ai re.
“Mana ting gap ai, dai hku gap taw ai majaw Mukchyik hte Lamang lapran kaw laknak 10 jan wa hkrat ai, masha chyawm si hkala ai lam n nga ai, mare ka-ang kaw wa hkrat ai majaw wan sumri di, dum n’ta nkau hten nna, U, Wa ni mung si ai,” nga tsun ai re.
Myen hpyen dap kaw na laknak kaba gap shadam bun wa ai majaw, dai mare hkan na mung shawa ni gaw tinang man ang ai shara ni de hprawng yen ma ai majaw, masha si hkala ai lam gaw nnga ai nga tsun ai re.
April 23 ya Myen hpyen dap gap bun ai laknak kaba si a majaw, Mukchyik mare na dum n’ta 2 hten mat nna, Lamyang mare na nawku jawng wang hte nta 5 daram hkra hten wa ai lam chye lu ai.
Dai sha n-ga, Lamyang mare na Bainem rem ai sun wang langai hta laknak wa hkrat kapaw ai majaw, Bainam 5 daram si mat ai nga matut tsun ai re.
Ndai laman KIA dap maga na Lamyang hte Mukchyik mare makau grup yin ni hta hpyen shamu shamawt ai lam ni galaw taw nga ai majaw, Myen hpyen dap maga na laknak kaba gap bun taw nga ai re nga, ginra masha ni tsun maram tawn ai re.
Waimaw makau grup yin hta, Myen hpyen dap hte KIA dap lapran hpyen masa shaja hkat ai shata mi jan du wa nga sai rai nna, ya ten dai ginra mayan na mung shawa ni tinang man ang ai shara ni de hprawng yen taw nga ai re.
April 19 ya shani hta mung, Chihpwi maga de hpyen n’gun wa sa na bai n htang yu wa ai Myen hpyen dap mawdaw hpe KIA dap maga Mukchyik mare kaw hkap shingla gasat dat ai hta Myen hpyen mawdaw langai yawng hten mat ai re.
