Maw Hpawng Nawku jawng wang kata kaw na sa rim woi mat ai Nawku hpung magam gun hte Jawng sin ni yawng hpe, April 23 ya shana hkying 7 daram hta bai dat dat ya sai lam chye lu ai.
April 20 ya shana hta sa rim woi mat ai Mawhpawng Buga Nawku hpung magam gun marai 3 hte jawng sin 2 hpe Myen hpyen dap ni rim woi mat ai hpang, April 22 ya shana hta Simsa lam akyu galaw hpung PCG ni kaw na, pahkam hkam ya ai hte bai lawt wa ai re lam Maw Hpawng ginra masha langai KNG shiga dap de tsun ai re.
“PCG ni kaw na litla ya rai nna, April 22 ya shana hkying 7 hta lawt wa ai, Nawku jawng wang de du hkra shan hte sa sa ya ma ai, san jep ai shaloi hpe adup abyen ai lam hpa n nga ai, atsawm akawm hte bai dat dat ya ai, PCG ni pahkam hkam ya ai nna bai lawt wa ai re nga ai,” nga tsun ai re.
Dai marai 5 hpe April 20 ya shana hta Mawhpawng Nawku Jawng wang kaw mara kata sa rim woi mat ai hpang, ya na zawn bai dat dat ya ai rai nga ai.
Ya na zawn rim woi hkrum ai Maw Hpawng buga masha ni gaw, Hpung Up Sara, Rev. Pausa Shawng La, Sara Dumhpau Mung San Naw, Jawng Sin Slg Ndup Gam hte, Kahtawlik Nawku hpung na Tara hkaw Sara Lungbang Hkaw Htang hte jawng sin Lahpai Gam Dut ni re lam chye lu ai.
Dai marai 5 hpe April 19 ya jahpawt Myitkyina Hpyen nbungli pa gap hkrum ai lam hte seng nna, san shaga ra ai lam nga ai majaw, nga nna, rim woi mat ai re lam chye lu ai.
Myen hpyen dap maga ya na zawn mara kata mung shawa ni hpe san jep wa ai majaw, hpang kalang ni hta mung ndai zawn bai byin wa na hpe mung shawa ni myit tsang taw nga ma ai re.
Myen hpyen dap daru magam zing kau ai hpang, ndai hpang daw majan bai laja wa ai ten, Myitkyina Myen hpyen dap nbungli pa jahkring hkring gap gasat hkrum ai lam ni nga taw ai re.
