Nawnglut Ginwang Sezin mare hta dap jung nga ai Myen hpyen dap Hk.M.Y (116) dap hpe nhtoi 4 ya laman KIA hte pawng hpawm dap maga htim gasat zing madu kau lu sai lam chye lu ai.
Sezin mare baw hta dung ai Myen hpyen dap shara hpe KIA hte pawng hpawm dap maga de na April 20 ya shani kaw na wang matep htim gasat taw nga ai gaw, nhtoi 4 ya ngu na April 24 ya jahpawt maga hta tsep kawp htim gasat zing madu kau lu sai re nga, shawng lam magam gun langai KNG shiga dap de tsun dan wa ai re.
“Shana yuptung ten Myen hpyen dap ni ayai aya hprawng pru mat wa ai hpang, anhte dap maga na shang lu sai, dai kaw hpyen n-gun 80 daram nga ai, dai hpawt mi mu ai hpang yawng jasan kau lu sai,” nga tsun ai re.
Myen hpyen hpung ni dai dap shara na pru mat wa ai hpang, dai hpawt manap KIA pawng hpawm dap maga na dai shara hpe Back Hold hte kanaw jahten kau sai lam matut tsun dan wa ai re.
Dai dap shara hta Myen Hpyen dap hte Sam Hkyeng SNA pawng hpawm nna, hpyen n-gun 80 daram hte dap jung nga ai shara rai nna, nkau law malawng Sagaing maga de hprawng pru mat ai re nga tsun ai re.
Ya ten Sezin mare hte dai makau grup yin ni hta pawng hpawm dap maga na shara jasan ai lam ni galaw nga nna, dai kaw na hprawng pru wa ai Myen hpyen hpung ni hpe mung naw hkat shachyut gap gasat taw nga ai lam tsun ai re.
Nhtoi 4 ya na ai Sezin majan hta lahkawng maga si hkala ai lam a tsawm tup hkrak n chye lu ai rai nna, dai majan hta Sam Hkyeng maga na ni mung hpyen n-gun law law hte shang lawm gasat wa ai lam matut chye lu ai.
Sezin Myen hpyen dap hpe KIA dap maga lai wa sai March shata hta laknak jahkrat asum jaw na matu tsun sadi jaw da ai rai tim Myen hpyen dap maga na hkap la ai lam n nga ai majaw, April 19 ya shani kaw na htim gasat hpang wa ai re nga shawng lam magam gun ni tsun ai re.
Sezin Balik dap hpe April 10 ya shani sa htim gasat wa ai hta, dai kaw nga ai Balik hpyen la ni laknak jahkrat asum jaw wa ai hpang, Sezin ginra yawng hpe KIA hte pawng hpawm dap ni sin madu da sai rai nga ai.
Dai mare hpe KIA maga nhtoi 10 ya daram up madu da ai hpang, Myen hpyen dap hpe bai htim gasat ai hta, nhtoi 4 ya laman hte sha htim gasat zing madu kau lu sai re.
