Jinghpaw Mung hte Sagaing jarit Indaw hte Naba lam num braw hta dap jung ai Myen hpyen hpung ni gaw, Indaw muklum maga de htingnut yen mat sai lam ginra masha ni kaw na chye lu ai.
Myitkyina Mandalay lam lapran Naba lam numbraw hta dap jung nna, lai wa lai sa mung mare masha ni hpe ladu lai san jep gumhpraw hta sha taw nga ai Myen hpyen n-gun 50 daram nga ai hpyen hpung ni gaw, April 20 ya daram hta htingnut yen mat ai nga, dai ginra na mung shawa ni KNG shiga dap de tsun dan ai re.
“Naba lam numbraw kaw nga ai Myen hpyen hpung ni yawng wa mat sai, bai sa wa na kun gaw n chye ai, hting nut mat wa ai chyawm gaw yawng hting nut mat sai mawdaw hte yen mat wa ai,” nga tsun ai re.
Lam numbraw hta dung ai Myen hpyen hpung ni gaw, Myitkyina Mandalay lam lapran hkawm sa ai mung shawa yawng hpe laja lana san jep nna, gumhpraw hta sha taw nga ai dap shara mung rai nga ai.
Dai zawn san jep ai hta, shan hte n tsen n hten ai mung mare masha ni hte, CDM ni hpe rim ahkyak la ai lam ni jahkring hkring galaw ai shara mung re nga tsun ai.
Myen hpyen dap ni dai shara na htingnut yen mat wa ai majaw, ginra masha ni kabu myit dik nga ma ai nga ginra masha ni tsun ai.
Myen hpyen hpung ni dai shara kaw na htingnut mat ai hpang, Indaw muklum makau grup yin na mare kahtawng ni hta hpyen n-gun 30 daram hte hpyen shamu shamawt ai lam ni galaw hkawm taw nga ai nga tsun ai re.
Dai shara hpe Myen hpyen dap daru magam zing kau ai hpang dap jung shara jahkrat ai shara re lam chye lu ai.
