Nmawk Mare hta Myen Hpyen Dap Ni Mung Mare Masha Nkau Hpe Hpyen Ninggang Hku Rim Woi Da

Nmawk mare makau grup yin hta KIA dap jahkring gan hting nut mat ai hpang, Nmawk mare kata Nawku Jawng wang hte mung shawa n nga ai dum nta ni hta Myen hpyen dap shara la taw nga ai lam ginra masha ni tsun ai re.

Lai wa sai April 22 ya shani Nmawk mare Hkanan lawk hte Hku Li maga majan gap gasat wa ai hpang dai makau grup yin hta du nga ai KIA dap maga gan hting nut da ya ai re.

KIA dap maga hting nut mat ai majaw, ya ten Nmawk mare kata na Nawku jawng hte madu n nga ai dum nta ni hkan Myen hpyen dap ni nga taw ai lam Nmawk ginra masha ni KNG shiga dap de tsun dan ai re.

“Ndai laman Myen ni grai bai shamu wa ai, ya jahpawt loi gap hkat ai hpang Myen ni mung shawa n nga ai dum n’ta hte Nawku jawng Hpaji jawng ni hkan shara la taw nga ai, madu n nga ai n’ta hkan na arung arai ni mung lagu shaw la taw nga ai,” nga tsun ai re.

Ya na zawn mung mare masha ni n nga ai dum nta hkan na shan hte ra ai arung arai ni hpe lagu mya la ai lam ni nga taw nga ai nga ginra masha ni matut tsun ai re.

Nmawk mare kata hta hpyen shamu shamawt hkawm nga ai Myen hpyen hpung ni gaw, mung mare masha ni hpe rim ahkyak la nna, hpyen ninggang shatai woi hkawm ai lam ni mung nga taw ai re.

Matut na rai tim, KIA dap maga na Myen hpyen dap shara hpe sa htim gap gasat wa ai rai yang, Nmawk mare yawng wan nat jahten kau ya na ngu tsun jahkrit da ai lam ni mung nga ai lam chye lu ai.

Lai wa sai April 22 ya shani majan hta, Myen hpyen dap maga laknak kaba, nbungli hte sa gap bun ai majaw, mung shawa si hkala ai lam hte dum nta hkra hten ai lam ni nga wa ai re.

Ya ten Nmawk mare kata Myen hpyen dap hte KIA dap lapran hpyen masa shaja hkat taw nga nna, ndai laman majan laja wa na masa nga ai lam ginra masha ni tsun maram nga ai re.