KIA Htim Gasat Zing Da Ai Namya Sut Chyai Maw De Nbungli Bawm Sa Jahkrat

Majan byin ai lam n nga ai rai tim, Hpakant lam Namya Sut Chyai Maw de dai hpawt manap hkying 9 chyen ten daram hta Y-12 nbungli hte bawm wa jahkrat bun kau da ai lam chye lu ai.

Namya mare hte deng 7 daram sha tsan ai Sut Chyai Maw maga de dai hpawt manap Y-12 nbungli lahkawng hte bawm sa jahkrat bun kau da nna, kalang dat bai n htang gayin wa mat ai nga dai ginra na mung shawa langai KNG shiga dap de tsun dan ai re.

“Sut Chyai Maw maga de sa jahkrat bun kau da ai, dai mayan hta sha jahkrat bun kau da na kalang dat bai gayin mat ai,” nga tsun dan ai re.

Ya nbungli bawm sa jahkrat bun kau da ai shara gaw, Namya mare gaiwang kata hta lawm ai shara re lam chye lu ai.

Dai ginra hta hpyen hte seng ai hpa n nga ai rai tim, Myen hpyen dap kaw na ya na zawn nbungli bawm sa jahkrat bun ai lam gaw, mung shawa ni hpe da sang sha-ang wa ai re nga tsun ai re.

Namya Myen hpyen dap hpe KIA dap maga htim gasat zing madu kau ya ai majaw, Myen hpyen dap ni matai bai htang ai hku na, sa gap bun ai lam rai na re nga, ginra masha ni tsun maram nga ai re.

Namya Myen hpyen dap hpe htim gasat zing madu kau ai hpang, dai ginra de laga mi majan byin ai lam n nga sai re.

Majna byin a ten hta nbungli hte kalang sa gap bun wa ai rai nna, ndai kalang hte rai yang lahkawng lang sa gap bun sai re lam chye lu ai.

Myen hpyen dap kaw na ya na zawn nbungli hte gap bun ai majaw, hkra hten ai lam ni gade daram nga ai ngu hpe a tsawm n chye lu shi ai re.

Namya majan ten laman hta Mung shawa dum nta 25 daram hten mat sai re.