Myitkyina htawng kaba hta, kasu kabrawng lam byin wa ai hta, htawng masha marai 4 si nna, marai 12 hkala hkrum wa ai lam uphkang hpung ni kaw na chye lu ai.
April 18 ya shana hkying 4 daram hta htawng kata kasu kabrawng byin ai hpe, Myen hpyen dap sinat gap shazim a hta, htawng masha marai 4 si nna, marai 12 hkala ai re nga, htawng hte ni nawn ai ni kaw na chye lu ai.
“Kaning raii gara hku na kasu kabrawng byin wa ai kun n chye ai, anhte mung htawng kata n mai shang ai re nga yang, dai kaw si ai gaw marai 4 hkala ai gaw marai 12 re sha chye dat ai, dai ni hpe Myitkyina tsi rung de htaw mat sai” nga KNG de tsun dan wa ai re.
Bawng masha ni hpe Lut Nyeing Chanthar hte dat ya ai hpang shani jang, ya na zawn kasu kabrawng byin wa ai rai nna, dai shana de htawng kata hta, hpri dum ai nsen, ဒို့အရေး၊ ဒို့အရေး nga nsen ni na ai nga htawng makau hta nga ai mung shawa ni tsun ai re.
Dai hpang, Myen hpyen dap mawdaw kaba langai hte Balik mawdaw langai htawng kata de shang mat wa ai hpang, sinat nsen 50 lang jan gap kapaw wa ai nga htawng makau hta nga ai mung shawa wa matut tsun dan wa ai rai nga ai.
Myen hpyen dap htawng masha ni hpe sinat gap bun ai majaw, htawng masha ni si hkala wa ai majaw, machyi masha htaw mawdaw ni htawng kata de shang mat wa ai re lam matut sagawn chye lu ai.
Ndai lam hte seng na Myitkyina Lekung lawk na lit nga ai ni hpe KNG kaw na san shaga yu yang marai 4 si nna, marai 12 hkala ai nga tsun dan wa ai re.
Dai si hkala ai ni hpe Myitkyina mung shawa tsi rung de htaw mat wa sai rai nna, gara hku kaning rai na kasu kabrawng byin wa ai ngu hpe a tsawm n chye ai nga tsun ai re.
Ya na zawn htawng kasu kabrawng byin ai lam gaw, htawng masha shalawt ai hta, rap ra ai lam n nga ai majaw, byin wa ai rai na re nga, mung masa yu maram ai ni tsun tawn ai re.
April 17 ya shani Myen shaning ningnan shani hta Myitkyina htawng kaw na marai 42 hpe shalawt ya ai hte, Mung masa lam hte rim hkrum da ai hkring mang lahkawng hte Sara kaba Hkalam San Son lawm ai rai nna, laga yawng gaw kani amu mang hkang hte lawt ni sa ni hpe shalawt dat ai rai nga ai.
