Mogaung Muklum Kata Gumhpraw Hta Sha Taw Ai Myen Hpyen Shagyit Ni Hpe Htim Gasat Sa Wa Na Lam Mogaung KPDF Dap Tsun
Mogaung muklum, muklum pru shang shara ni hta gumhpraw hta sha taw nga ai Myen hpyen dap hte Pyithutsit dap shara ni hpe madung tawn gasat shamyit sa wa na re nga, Mogaung KPDF dap na lit nga ai ni KNG shiga dap de tsun dan ai re.
Dai majaw Myen hpyen shagyit makau hta nga ai mung mare masha ni lawan yen na matu lai wa sai April 7 ya shani sadi jaw ndau laika shapraw wa ai rai nga ai.
Ya ten PDF dap maga htim gasat dat yang, mung mare masha ni hkra machyi na hpe myit tau nna, bungli rai n shang shi ai rai nna, Myen hpyen dap shara hte ni nawn ai mung mare masha ni ndai laman htawt sit yen na matu tsun da ai re.
“Lama ma galaw sana nga yang, mung shawa ni hpe myit tau nna n galaw byin ai lam ni nga ai, da majaw, Myen gwi dap ni nga ai shara ni hta mung shawa ni hpawng chyawm ai lam n galaw na matu tsun mayu ai, ya ten Myen hpyen shagyit ni gaw gumhpraw grai hta sha taw nga ma ai majaw dai ni hpe madut gasat sa wa na lam nga ai,” nga Mogaung KPDF na lit nga ai langai tsun ai re.
Mogaung muklum makau grup yin hta, Myen hpyen shagyit 3 daram nga ai re lam chye lu ai.
Myen hpyen dap daru magam rai n zing shi ai ten, muklum kata shagyit langai sha nga ai rai tim, daru magam zing ai hpang kaw na ya na zawn shagyit ni grau grau law jat wa ai rai nga ai.
Jinghpaw mungdaw kata majan laja wa ai ndai laman hpang kaw na Myen hpyen dap ni gaw, mung shawa hking hking nna, gumhpraw hta sha taw nga ai re.
