Wuyan Pyithutsit Dap Gap Gasat Hkrum Ai Hpang N’ta Nat Jahten Hkat Ai Lam Ni Byin Wa
Waimaw Wuyan mare na Pyithutsit dap hpe Wunpawng Mungdan Shanglawt Hpyen dap KIA dung 3 ni sa gap bun ai hpang kaw na, shada lahkawng maga n’ta wan nat jahten hkat ai majaw, dai ginra na dum n’ta 14 wan hkru hten wa sai re.
Lai wa sai April praw 5 ya shana maga, Wuyan Pyithutsit dap shara hpe KIAd dap laknak kaba sa gap bun ai hta, Pyithutsit dap maga de na hkra machyi ai lam ni nga wa ai zawn, dai ginra na Pyithutsit ningbaw wa ai dum nta hpe sa nat jahten ya ai kaw na ya na zawn byin wa ai re nga dai ginra na mung shawa lagai KNG shiga dap de tsun dan wa ai re.
“Anhte maga na ni praw 5 ya shana Wuyan mare na Pyithutsit gate hpe shawng laknak kaba 4,5 lang sa gap bang ya ri nga ai, dai hpang Pyithutsit ningbaw wa a nta mung wan hkru wa ai, dai hpang gaw magam gun ai ni a nta bai nat, hpang jahpawt gaw Lisu mare ngu ai Htaw Gaw mare de bai nat 10 nga kun nat jahten kau, ngut na mani gaw Lamyang mare na magam gun nta re nga hpe bai nat e dai hku rai nga ai,” nga tsun dan ai re.
April praw 5 ya shana Wuyan Pyithutsit ningbaw Ngraw Hu Sa a nta hpe KIA hte PDF dap ni wan nat jahten kau ya ai hpang, shana hkying 7 daram hta KIA magam gun nta 3 hpe Wuyan Pyithutsit dap ni wan bai nat jahten wa ai re nga tsun ai re.
Dai hpang jahpawt, Htaw Gaw Lisu mare na dum nta 10 daram wan bai nat hkrum wa ai rai nna, Laban shani hta Lamyang mare na KIA magam gun n’ta langai bai nat hkrum wa ai rai nga ai.
Dai majaw ndai nhtoi 3 ya laman dai ginra na dum n’ta hting gaw 14 nat jahten hkrum wa ai re nga ginra masha ni tsun ai re.
Wuyan mare hta nat hkrum ai dum nta masum gaw, Slg Mandau Hong Dan, Lahaw Hawng Ze, Lagang Hkawng Ze ni na dum nta re lam chye lu ai.
Htaw Gaw Lisu mare makau hta dai jahpawt nta rai nnat hkrum shi ai ten, majan jahkring gap gasat hkat wa ai hpang, ya na zawn dum nta wan nat hkrum ai re lam chye lu ai.
April praw 6 ya shani hta mung Washawng mare lahta Wa Shaga Bum hte Nang Zaw Yang maga de hpyen n-gun 50 daram hte shamu shamawt hkawm nna, dai makau grup yin de nbungli bawm sa jahkrat bun wa ai lam mung nga ai re hpe chye lu ai.
Ya na zawn lahkawng maga dap de na, laknak kaba gap bun hkat ai hte, dum nta wan nat ai mabyin lam ni a majaw, dai ginra na mung shawa yawng tinang man ang ai shara de hprawng yen taw nga ai re.
Waimaw Wuyan maga de ya na zaw hpyen masa shaja hkat ai lam hte dum n’ta wan nat jahten ai lam ni n byin hkra lahkawng maga dap, bawng ban jahkrup taw nga ai majaw, dai ni April praw 8 ya shani gan zim taw nga ai nga, ginra masha ni tsun ai re.
Ya ten Waimaw hte Washawng lapran hpyen masa shaja hkat nga ai lam ni a majaw, ginra masha ni majan byin wa na hpe myit tsang let nga taw ai re.
