Myen hpyen dap ni ndai laman Majan byin ai lam n nga ai rai tim, nbungli hte bawm hkan jahkrat bun nga ai lam shawng lam magam gun ni kaw na chye lu ai.
April praw 6 ya shani ka-ang hkying 12 aten daram hta, KIA Dung 3 ginra Wa Shaga Bum hte Nang Zaw Yang maga de Jet Fihter nbungli lahkawng, Y-12 nbungli langai hte bawm sa jahkrat bun wa ai nga shawng lam magam gun ni tsun ai re.
Dai shana hkying 10 daram hta sha KIA Dung 11 shara de mung nbungli hte wa gap bun wa ai re.
Myen hpyen dap kaw na ya na zawn nbungli hte hkan gap sharu bun taw ai lam hte seng nna, hkra hkala ai lam nga, n nga hpe a tsawm tup hkrak n chye lu ai re.
Dai hpawt manap hta mung,Manmaw lam Kung Law, Myothit Hku Li hte Na Lai makau grup yin ni hta, nbungli hte bawm sa jahkrat bun wa ai lam ginra masha ni tsun ai re.
Ya ten Myen hpyen dap shara ni hpe KIA htim shagrawt nga ai hta, Myen hpyen dap maga nbungli hta lai nna, hpyen n-gun hpa n nga mat sai hpe mu lu taw ai lam shawng lam magam gun ni tsun ai re.
Ndai laman Sumprabum mayan de mung, shani shagu ngu na nbungli sa pyen gayin taw nna, bawm sa jahkrat bun ai lam ni ding yang galaw taw nga ai lam chye lu ai.
