Namya Mare hta Majan Laja Taw Nga Nna Nbungli Bawm A Majaw Mung Shawa Dum N’ta Hkru Hten Nga
Hpakant Lam Nam Ya mare Myen hpyen dap hpe, Wunpawng Mungdan Shanglawt Hpyen Dap KIA kaw na, htim shagrawt taw nga ai gaw, dai ni du hkra majan laja taw nga nna, Myen hpyen dap maga nbungli hte wa gap ai majaw, mung shawa dum nta wan hkru hten taw nga ai lam ginra masha ni tsun ai re.
Namya Myen hpyen dap hpe laknak jahkrat na matu laika hte tsun sadi jaw wa ai hpe n hkap la ai majaw, April praw 9 ya jahpawt kaw na KIA pawng hpawm dap maga htim gasat hpang wa ai rai nga ai.
Dai zawn htim gasat ai hta, Myen hpyen dap maga sum machyi lam ni law wa ai majaw, Myitkyina de na lung wa ai Jet Fighter nbungli hte bawm sa jahkrat bun nna, mung shawa dum nta wan hkru ai lam ni byin taw nga ai nga, ginra masha langai KNG de ndai zawn tsun dan ai re.
“Mani hpawt kaw na gap gasat hpang wa ai, dai shawng shana hkan kaw na Myen hpyen dap laknak kaba hte lup wa kawng maga de gap taw sai, dai ni gaw nbungli hte wa gap ai majaw, nta ni mung hkru taw nga ai,” nga tsun dan ai re.
Hpakant lam mayan na kaba dik dap shara rai nga ai, Namya Byuha dap hta Pyithutsit hte Myen hpyen n-gun 60 daram nga ai dap shara rai nna, hkrun lam hkawm mung mare masha ni hpe laja lana san jep ai dap shara mung rai nga ai.
Ya ten dai mare makau grup yin hkan na mung mare masha ni gaw, nam maling ni de hprawng yen hkawm taw nga ai re.
